DILI, 21 dezembru 2021 (TATOLI)— Komisaun Anti Korrupsaun (CAC,sigla Portugés) ezekuta mandadu buska no apreensaun ba Diretór kompañia Gráfika Pátria unipesoal Lda, ho inisiál EW no Timór-oan ida, ne’ebé deskonfia komete krime falsifikasaun dokumentu.
Buska no apreensaun durante oras neen hahú hosi tuku 8:00 dader to’o 13:30 lokraik liuhosi Ekipa Investigadór Komisaun Anti-Korrupsaun nian lidera husi Diretór Informasaun no Seguransa, Euclides Madeira akompaña ho Diretór Investigasaun Kriminál, Emilio Dias Quintas serbisu hamutuk ho Polísia Nasionál Servisu Investigasaun Kriminál (PNSIK) no ekipa investigador CAC ezekuta mandadu Tribunal Distrital Dili (TDD) nian ho númeru NUC 0012/21.CACTL, loron 9/12/2021, asina hosi juiza Albertina da Conçeicão da Neves.
Mandadu ne’e fó podér mai investigador CAC nian hodi halo buska demisiliaria no apreensaun ba emprezariu nain rua (2), hanesan ida Timoroan no ida seluk estranjeiru tanba diskonfia envolve iha kazu krime fraude fiskál no falsifikasaun iha sira ninian edifisiu Lecidere Dili.
“Ami ezekuta mandadu hosi TTD hodi halo buska no apreensaun ba iha kompañia Gráfika Pátria tanba deskonfia komete falsifikasaun dokumentu no fraude fiskál, ne’ebé envolve direta hosi Diretór kompañia rasik no Timor-oan na’in iha Bairru Formoza,” Portavóz ekipa Investigadór KAK, Euclides Madeira, informa, hafoin halo buska no apreensaun iha edefisiu kompañia gráfika pátria, iha Leicidere, Dili, tersa ne’e.
Iha prosesu buska no apreensaun ne’e, KAK konsege halibur no foti evidénsia ho dokumentu hamutuk item 32 ne’ebé sei suporta prosesu investigasaun.
“Ohin dokumentu ne’ebé, ami konsege foti mak iha items 32 no sira seluk tan nune’e evidénsia sira ne’e ita lori ba atu suporta prosesu investigasaun. Sira na’in rua ne’e, ami sei lori ba iha edifisiu KAK atu investiga tanba prosesu indentifikasaun tuir mandadu ne’ebé mak iha katak iha ne’ebá maka evidensia forte ita halo detensaun ba sira iha sela KAK,” Portavóz ekipa investigadór ne’e informa.
Rezultadu servisu sekreta CAC nian iha tereñu revela katak suspeitu ho sira ninian kompañia kontinua manán projetu iha ministériu balun, maski kompañia ninian divida, lisensa komérsiu invalid (mate) ona hodi hamosu fraude fiskal ka la selu taxa.
Investigadór CAC nian sei halo investigasaun kle’an liután hodi rekolla informasaun, evidensia iha ministériu balun mensiona iha karta mandadu buska atu revela verdade iha prosesu aprovizionamentu.
Iha operasaun buska no apreensaun, investigador CAC konsege halibur dokumentu lubun bo’ot hanesan passporte, konta bankaria, dokumentu kompañia Gráfika pátria nian, telefone no dokumentu sobre projetu balun iha Ministériu balun, ne’ebé kompania ne’e manán nuudar evidénsia no objetivu krime.
Ekipa investigador CAC oras ne’e sei rona suspeitus nain rua iha edifisiu CAC Farál no evidensia forte, sei detein sira durante oras 72, molok aprezenta ba iha tribunál hodi tuir primeiru integrogatóriu.
Bainhira jornalista sira tenta atu kofirma ba Diretór Kompañia Grafika Pátria ho inisiál EW, maibé nia parte lakohi ko’alia.
Jornalita : Natalino Costa
Editór : Florencio Miranda Ximenes
