COVALIMA, 23 dezembru 2021 (TATOLI)—Servisu Saúde (SS) munisípiu Covalima hala’o avaliasaun ba servisu anuál kona-ba knar durante pandemia COVID-19 liu-liu kona-ba polítika nasionál vasinasaun no implementasaun programa regulár.
Notísia Relevante: Pesoál Saúde Covalima buka komunidade iha to’os simu vasina
“Ita halo avaliasaun ba servisu anuál durante pandemia COVID-19 liu-liu iha parte vasinasaun ne’ebè ita hahú iha fulan abril to’o fulan dezembru implementasaun programa regulár. Iha Covalima ita-nia kobertura vasinasaun to’o iha ne’ebé ona no obstákulu saida mak ita hasoru,” Diretòr Servisu Saúde Munisípiu Covalima, Filipe Pereira Lemos, hateten ba jornalista sira iha salaun administrasaun Covalima, kinta ne’e.
Enkontru avaliasaun servisu anuál ne’e realiza ho intensaun atu identifika problema ne’ebè mak durante ne’e pesoál saúde sira enfrenta, liu-liu hasoru problema implementasaun vasina COVID-19.
Aleinde haree kona-ba implementasaun programa vasinasaun, nia dehan, iha enkontru ne’e haree mós problema implementasaun programa regulár hahù iha fulan janeiru to’o fulan-dezembru nia rezultadu servisu.
“Hamutuk ho profisionál saúde, autoridade lokál, parseiru dezenvolvimentu ho seguransa sira, ita bele haree problema implementasaun programa iha baze hahú hosi postu administrativu to’o iha aldeia, hodi apresenta rezultadu no obstákulu ne’ebé mak profisionál saúde sira enfrenta. Nune’e, ita hamutuk ho parte hotu, ita bele buka solusaun hodi tau planu ba tinan 2022 nian,” nia dehan.
Dezafiu ne’ebé profisionál saúde sira enfrenta mak komunidade iha áreal rurál seidauk iha konsiénsia hodi fiar informasaun falsu hosi rai-li’ur hodi lakohi simu vasina no ba implementasaun.
Kona-ba implementa programa regular, ninia problema mak iha sentru saúde no postu saúde balun menus rekursu, la asesu ba eletrisidade, la asesu bee-moos no hirak ne’e sai impaktu hodi halo atendimentu ba komunidade.
Nia parte sei buka solusaun hodi envolve parte hotu iha tinan oin hanesan sentru saúde ka Postu saúde bele asesu bee-moos no eletrisidade iha tempu oin mai, Governu ida-ne’e oinsá bele dada ahi ba fasilidade saúde sira, nune’e pesoál saúde halo atendementu ba komunidade ho di’ak.
Postu saúde sira-ne’ebé mak seidauk asesu ba elétrisidade mak hanesan postu saúde Dato Rua, Laktos, Dato Tolu no postu saúde Alastehen.
Maske profisionál saúde hasoru dezafiu maibé sira mós hala’o servisu, nune’e programa vasina iha Covalima ba doze dahuluk atinje ona 96,6% no vasina doze daruak foin atinze 70%.
“Iha parte vasinasaun, foufoun ita-nia komunidade laiha konsiénsia maibé ita envolve autoridade lokál hotu hodi servisu hamutuk ho profisionál saúde nafatin konvense ba ita-nia komunidade, nune’e atinjimentu vasinasaun iha Covalima la’o ho di’ak,” nia haktuir.
Aleinde taxa kobertura vasinasaun aas iha Covalima maibé inan isin-rua sira mós iha ona konsiénsia tanba númeru konsultasaun inan isin-rua iha sentru saúde no postu saúde sira mós agora aas tanba inan isin-rua sira badinas ba konulta iha postu no sentru saúde,
“Ita bele hateten, ita-nia inan isin-rua sira barak mak agora iha ona konsiénsia tinan-tinan númeru konsulta sa’e iha sentru saúde no postu saúde sira, ne’ebé inan isin-rua partu iha fasilidade saúde,” nia hateten.
Iha munisípiu Covalima, iha sentru saúde hitu (7) no hosi nùmeru ne’e inan isin-rua menus partu iha sentru rua, tanba laiha ambulánsia nune’e inan isin-rua barak mak partu iha uma maibé hetan asisténsia hosi parteira sira.
Notísia Relevante: PM fó parabéns tanba taxa vasinasaun Covalima okupa segundu lugar
Jornalista : Celestina Teles
Editór : Cancio Ximenes
