DILI, 24 dezembru 2021 (TATOLI)– Prezidente Repúblika, Francisco Guterres Lú-Olo akompaña hosi espoza Cidália Lopes Nobre Mouzinho Guterres no família partisipa misa Natál hamutuk ho sarani sira, ne’ebé prejide hosi Arcebispo Metropolitana Dili, Don Virgílio do Carmo da Silva iha Igreja katedrál-Dili.
Hafoin misa, Xefe Estadu, hatete durante tinan ne’e Timor-Leste no mundu hasoru dezafiu oin-oin no durante ema hotu nia moris.
“Hanesan sarani no mós hanesan Prezidente Repúblika ha’u hakarak deseja ha’u nia natál ba povu Timor-Leste tomak. Em Partikular ba ita nian titular órgaun soberania sira hotu, ba ita nian eis órgaun sobrania sira hotu no ba ita hotu iha ne’e, ami nian votus natál ba hotu -hotu espera sei hakat liu dala ida tan ba tinan 2022 ho haksolok”, Prezidente Repúblika (PR), hato’o mensajen Natál ne’e hafoin partisipa misa kalan-natál iha iha Igreja Katedrál Dili, sesta ne’e
Xefe Estadu mós sente kontente tanba hetan votus Natál direta hosi Arcebispo Metropolitana Dili, Don Virgílio do Carmo da Silva ne’ebé hato’o mós mesajen hosi Amo Papa Francisco.
“Ita hotu hakat liu dezafiu oin-oin iha ita hotu nia moris durante tempu ida ne’e, ohin, ha’u mai ho ha’u nia família partisipa misa ida ne’e hamutuk ho sarani sira atu halo reflesaun ba loron na’in jesus moris. simu ho haksolok mensajén hosi ita nia Bispu Dili (Dom Virgílio do Carmo da Silva) no simu ho haksolok mensajen husi papa Francisco ne’ebé hato’o ba sarani sira hotu iha mundu,” Xefe Estadu kontente.
Jornalista : Natalino Costa
Editór : Florencio Miranda Ximenes
