DILI,06 janeiru 2022 (TATOLI)— Ministériu Saúde (MS) hala’o kooperasaun ho Hospitál Nasionál Guido Valadares (HNGV) no Sentru Saúde sira iha Dili, hodi muda ona pasiente dengue moderadu na’in-23 hala’o tratamentu intensivu iha sentru internamentu Vera-Cruz-Dili.
Pasiente dengue moderadu na’in-23 mai hosi, HNGV na’in-lima no na’in-18 ne’e mai hosi sentru Comoro no sentru saúde sira seluk iha Dili laran.
“Pasiente 23 ne’e, na’in 18 mak afetadu dengue, maibé kaman, ne’ebé atu halo observasaun iha Vera-Kruz no kazu seluk mak problema respiratóriu. Hosi kazu hirak ne’e maioria labarik ho idade 0-5,’’ Koordenadór Internamentu Vera-Cruz, Romel Braz, hateten ba Agência TATOLI, sentru Vera-Cruz, kinta ne’e.
Notísia Relevante: HNGV laiha espasu sufisiente simu pasiente
Daudaun, Sentru Saúde ne’e iha medikamentu no ekipamentu sufiesinte hodi fó tratamentu intesivu ba pasiente dengue moderadu sira.
“Ita foin horikalan mak muda pasiente sira ne’ebé ami sei instala mákina laboratóriu nian atu ita teste esensiál ba iha dengue hodi asegura sentru internamentu ne’e funsiona ho diak,’’ nia informa.
Nia afirma, Profisionál Saúde hamutuk 22 mak fó atendimentu ba pasiente na’in-23. Nune’e rekursu umanu sufisiente atu asegura kondisaun pasiente hirak ne’e.
MS hamutuk ho HNGV no Servisu Saúde Munisípiu Dili prepara ona kama hamutuk 54 iha sentru ne’e, hodi atende ba pasiente kazu dengue no moras seluk.
Notísia Relevante: HNGV laiha espasu, MS planu muda pasiente ba Vera-Kruz
Jornalista : Felicidade Ximenes
Editór : Florencio Miranda Ximenes
