DILI,10 janeiru 2022 (TATOLI)— Servisu Saúde Munisípiu Ermera, iha semana datoluk fulan janeiru ne’e, rejista pasiente pozitivu dengue na’in-ualu, hosi númeru ne’e na’in-haat mak mate.
“Daudaun ne’e, Ministériu Saúde rejista kazu dengue na’in-ualu iha Munisípiu Ermera, hosi númeru ne’e na’in-haat mak mate. Kazu ne’e afeta ba labarik idade lima mai kraik,’’ Diretór Servisu Saúde Munisípiu Ermera, Antonio Fatima, informa ba Agência TATOLI, via telefónika, segunda ne’e.
Notísia Relevante: Semana dahuluk, MS rejista kazu dengue 174 no óbitu na’in-ida
Diretór António afirma, pasiente hirak ne’e to’o oha sentru saúde ho sintoma ne’ebé grave liuliu hanesan isin manas maka’as no ran sai hosi inus.
“Maski, ami halo intervesaun médiku, maibé la konsege salva labarik na’in haat ne’e tanba ho moras ka kazu grave ona,” nia akresenta.
Nune’e, SSM Ermera koopera ona ho autoridade lokál atu halo intervesaun liuliu halo promosaun saúde no vijilánsia epidemolojia no saúde Ambientál hodi komunidade bele iha konsénsia hamoos uma laran no fatin públiku sira.
“Hau husu ba komunidade sira katak oras ne’e rai udan presiza hamoos uma ninin sira, kalen aat sira hakoi, roda aat sira hamoos no toba iha muskatériu laran,’’ Diretór ne’e apela.
Kona-ba aimoruk abate no fomigasaun Munisípiu Ermera sufisiente hodi rega susuk atu kombate moras dengue iha munisípiu ne’e.
Nune’e, Ministra Saúde, Odete Freitas Belo orienta ona Diretór saúde munisípiu sira atu halo intervensaun liuliu halo atividade fomigasaun iha área risku sira hodi prevene moras dengue.
“Ita haree munisípiu sira iha estoke aimoruk fomigasaun no abate sufisiente, ne’ebé ami orienta ona atu halo intervensaun liuliu rega susuk no limpeza iha área risku hodi prevene moras dengue ne’e,” Diretór Saúde Públik, iha Ministériu Saúde, Carlito Coreia hateten.
Númeru dengue sa’e ba 288
Ministériu Saúde (MS), Ohin loron 10 janeiru 2022, rejista kazu dengue iha territóriu nasionál hamutuk 228 no kumulativu óbitu na’in-lima.
Hosi totál ne’e, maioria kazu ne’e deteta husi munisípiu Dili ho totál 191, hafoin munisípiu Manatuto ho kazu 17, munisípiu Ermera ho kazu ualu, hosi númeur óbitu na’in-haat ne’ebé relata iha terseira semana fulan-janeiru ne’e
Entretantu, munisípiu Covalima ho totál kazu hitu, Viqueque kazu tolu, munisípiu bobonaro kazu ida no ikus liu munisípiu Liquiça ho kazu ida. Enkuantu ba munípiu sira seluk seidauk relata tanba seidauk rejistu kazu dengue.
MS apela
Ministériu Saúde (MS) apela ba populasaun iha Dili laran no mós iha Munisipiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka sente laran sa’e, liman-ain no sikun moras hodi bele hetan atendimentu husi profisionál saúde sira.
Apela mós ba populasaun iha Dili laran no mós iha Munisipiu sira seluk liuliu husu ba Autoridade Munisipál no Autoridades lokál atubele orienta komunidade halo limpeza jerál iha suku no bairru, fase tanke, bidon ka balde tau bee semana ida dala ida.
Hamoos sasan ka limpeza hanesan roda aat, bazu ai-funan atu susuk labele tau tolun, haloot ropa ho di’ak iha ita nia uma laran, uza ropa ne’ebé liman naruk, karik toba iha tempu loron, uza aimoruk hanesan repelente ka autan, uza muskitéru karik toba iha tempu loron no soe lixu iha nia fatin.
Notísia relevante: MS hahú sensibiliza informasaun prevene dengue iha Dili
Jornalista : Felicidade Ximenes
Editór : Florencio Miranda Ximenes
