DILI, 03 fevereiru 2022 (TATOLI)–Banku Sentrál Timor-Leste (BCTL, sigla portugés) fó sai relatóriu trimestrál fundu petrolíferu ba trimestre ne’ebé termina iha loron 31 dezembru 2021, hatudu kapitál biliaun $19,65, ne’ebé iha trimestre dahuluk biliaun $19,17.
Reseita ne’ebé simu durante trimestre ne’e hamutuk millaun $467,10, kompostu hosi kontribuisaun hosi kontribuinte sira hamutuk millaun $284,17 no pagamentu royalty ba Autoridade Nasionál Petróleu Minerál (ANPM) millaun $180,43 no anuál pipeline fee millaun $2,50.
“Rendimentu hosi investimentu fundu hamutuk millaun $357,70, kompostu hosi kupaun no dividendu ne’ebé simu hamutuk millaun $57,72, ne’ebé iha mudansa valór merkadu nian millaun $303,46 no movimentu cambiais mak millaun $0,56 iha trimestre ne’e, hodi rezulta rendimentu ba karteira fundu durante trimestre ne’e 1,88%, enkuantu rendimentu sasukat ka benchmark nian ba períodu ne’e mak 1,91%,” refere nota ne’ebé Agência TATOLI asesu, kinta ne’e.
Notísia relevante: Kapitál Fundu Petrolíferu to’o 30 setembru atinje biliaun $19,17
Nune’e, osan kontadu líkidu ne’ebé sai hosi fundu durante trimestre ne’e hamutuk millaun $353,32, kompostu hosi millaun $350 transfere ba Orsamentu Jerál Estadu (OJE) 2022 no millaun $3,32 kobre kustu jestaun.
Enkuantu, rendimentu portofóliu instrumentu merkadu finanseiru iha períodu ne’e 1,88%, kompara ho rendimentu referénsia mak 1,91%.
Jornalista : Antónia Gusmão
Editora : Julia Chatarina
