iklan

EKONOMIA, INTERNASIONÁL, HEADLINE

Timor Resources deside hapara atividade perfurasaun iha posu Feto Kmaus

Timor Resources deside hapara atividade perfurasaun iha posu Feto Kmaus

Ministru Petróleu no Minerál, Victor da Conceição Soares. Imajen TATOLI/Francisco Sony

DILI, 03 fevereiru 2022 (TATOLI)—Empreza australiana, Timor Resources, Pty.Ltd deside hapara atividade perfurasaun iha posu rai-maran Feto Kmaus, iha aldeia Tabacolot, suku Debos, postu Suai, munisípiu Covalima tanba bazeia ba teste laiha valór komersiál.

“Kona-ba perfurasaun ne’ebé empreza Timor Resources fura iha posu dahuluk, hanesan posu Feto Kmaus ne’e hatudu katak laiha rezultadu komersiál. Tuir Autoridade Nasionál Petróleu no Minerál (ANPM) nia opiniaun katak laiha rezultadu. Empreza sente katak do que gasta tan osan barak no rezultadu laiha di’ak liu taka iha fulan kotuk,” Ministru Petróleu no Minerál (MPM), Víctor da Conceição Soares, hateten, iha salaun Timor-Plaza, kinta ne’e.

Notísia relevante: Timor-Leste marka istória dahuluk halo perfurasaun mina iha rai-maran

Nune’e, governante ne’e klarifika liután katak nia parte simu ona informasaun ofisiál hosi empreza no ANPM rasik, katak to’o agora empreza muda ona ba fatin seluk.

“Taka iha dezembru 2021 bainhira óleu nakfakar, entaun sira atu kontinua sente la viável entaun sira para no muda fali ba posu Karau, ne’ebé agora ninia progresu metru 940 perfundidade, enkuantu nia alvu metru 1.400 to’o 1.800, entaun foin mak metade,” nia akresenta.

Iha loron 27 outubru 2021, Governu halo lansamentu perfurasaun iha posu Feto Kmaus iha área kontratu PSC TL-OT-17-08 Covalima no PCS- TL-OT-17-09 área kontratu Manufahi ho Ainaro, ne’ebé mak Governu Timor-Leste liuhosi ANPM antes ne’e asina kontratu ne’e ho Timor Resources Pty.Ltd, hanesan operadór ho nia parseiru Timor Gas no Petróleu, Empreza Públika (Timor GAP, E.P) iha tinan 2017.

Feto Kmaus hanesan posu antigu ne’ebé mak fura ikus iha tinan 1971, ne’ebé tama tinan 2021 kompleta tinan 50 fura fali iha rai-maran.

Notísia relevante: Perfurasaun posu Feto Kmaus seidauk hatudu deskobrimentu komersiál

Kontratu ne’ebé iha hatúr kompromisu Timor Recources no Timor GAP, E.P atu halo perfurasaun mínimu metru 2.000 vertikalmente ka posu lubuk balun ho komulativu metru 2.000 vertikalmente.

Antes ne’e, Prezidente ANPM, Florentino Soares Ferreira, hateten, maski iha ona atividade perfurasaun iha posu Feto Kmaus maibé empreza seidauk deklara deskobrimentu komersiál tanba laiha atividade perfurasaun durante dékada hirak nia-laran no laiha dadus sufisiente atubele dehan perfurasaun iha valór komersiál.

Jornalista : Antónia Gusmão

Editora     : Julia Chatarina

iklan
iklan

Leave a Reply

iklan
error: Content is protected !!