DILI, 08 fevereiru 2022 (TATOLI)—Ministru Transporte no Komunikasaun (MTK), José Agustinho da Silva, informa, Aviaun QANTAS sei halo operasaun asegura konetividade via aérea entre Timor-Leste no Austrália.
“Akordu servisu aéreu entre Governu Timor-Leste no Austrália durante ne’e iha ona, tinan kotuk Parlamentu Nasionál Timor-Leste ratifika ona, ne’ebé sai baze ba Governu Austrália atu dezigna nia aviaun ruma mai Timor-Leste hodi asegura konetividade aérea. Governu Austrália mós hato’o ona karta mai Governu liuhosi Autoridade Aviasaun Sivil Tiimor-Leste (AACTL, sigla portugés), hodi dezigna Aviaun QANTAS mai Timor-Leste,” Ministru José Agustinho da Silva, relata hafoin hasoru Primeiru-Ministru (PM), Taur Matan Ruak, iha Rezidénsia Farol, tersa ne’e.
Notísia relevante: Hafoin ratifikasaun akordu, aban aviaun Qantas voo dahuluk mai Timor-Leste
Nune’e, dokumentu kona-ba Air Operation Certificate (AOC) ne’e Autoridade Aviasaun Sivil sertifika ona, katak dokumentu sira ne’e prienxe ona rekezitu tékniku.
Aleinde ne’e, MTK liuhosi AACTL hasai ona sertifikadu no manda ona ba Autoridade aviausaun sivil Austrália nian.
Kona-ba preparasaun téknika, sei iha koordenasaun entre Embaixada Austrália no Ministériu Negósiu Estranjeiru no Kooperasaun (MNEK) Timor-Leste, atu anunsia voo dahuluk iha Austrália ne’ebé tuir planu iha loron 27 marsu 2022.
Enkuantu, atu konkretiza planu ne’e, Ajénsia Nasionál Aviasaun Timor-Leste (ANATL) sei prienxe mós espasu ba reprezentante Aviaun QANTAS iha Timor-Leste, atu nune’e bele asegura voo komersiál bainhira realiza.
“Asuntu ne’ebé Governu Timor-Leste liuhosi Ministériu Transporte no Komunikasaun sei husu mak liga ho presu billete mínimu no másimu, tanba realizasaun voo ne’e atu fasilita movimentu populasaun, tanba ne’etenki iha serteza kona-ba situasaun ne’e. Tanba ne’e, Aviaun QANTAS disponível atu oferese dadus presu billete,” Ministru subliña.
Jornalista : Antónia Gusmão
Editora : Julia Chatarina
