DILI, 15 fevereiru 2022 (TATOLI)—Reprezentante povu iha uma fukun Parlamentu Nasionál husu Governu liuhosi Ministériu Saúde atu tau atensaun ba fasilidade no aumenta médiku iha hospitál Veteranu iha Munisípiu Baucau.
“Ospitál veteranu iha Baucau uluk ita inaugura tiha ospitál ida-ne’e maibé iha ospitál ne’e rasik fasilidade sira ekipamentu menus,” Prezidente Komisaun F ne’ebé trata asuntu Saúde, Noé da Silva ‘Buka Tuir’, levanta iha plenária Parlamentu Nasionál, tersa ne’e.
Aleinde tuir fiskalizasaun komisaun nian observa katak aimoruk menus no rekursu ne’ebé daudaun destaka iha ospitál refere iha de’it médiku ida nune’e presiza tsn aumenta médiku.
“Kuaze veteranu sira hosi Baucau, Viqueque, Lospalos, Manatuto sorin ba halo tratamentu iha ne’ebá maibé ita-nia doutór sira menus, nune’e husu bele karik liu-liu Ministériu Saúde bele haree koloka tan médiku sira balun iha ospitál refere,” nia dehan.
Hatán ba preokupasaun ne’e reprezenta Governu liuhosi Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jeronimo, hateten rejista hela preokupasaun ne’e sei enkamiña ba ministérriu tutela hodi bele responde imediatu.
Jornalista : Nelson de Sousa
Editór : Cancio Ximenes