DILI, 15 fevereiru 2022 (TATOLI)—Diretór Jerál Sekretáriu Estadu Arte no Kultura, Manuel Ximenes Smith, informa polítika atu estabelese Akademia Arte Kreativa Indústria Kulturál ne’e, Ministériu Ensinu Superiór Siénsia no Kultura liuhosi Sekretária Estadu Arte no Kultura halo ona diskusaun ho Universidade Nasionál Timor Lorosa’e atu integra Akademia Arte Kreativa Industria Kulturál ba iha Fakuldade Ekonomia no Jestaun, Departamentu Komérsiu no Turizmu.
Notísia relevansia: Estabelesimentu Akademia Arte no Múzika sei iha faze preparasaun lejislasaun
“Ita hatene katak daudaun ne’e estatutu UNTL mós halo hela alterasaun iha Ministériu Ensinu Superiór Siénsia no Kultura, no ho biban ida-ne’e mak ita hanoin hakarak halo diskusaun ho ita-nia Magnifiku Reitór UNTL ho nia estrutura tomak, nune’e ita-nia sorumutu ne’e realiza tiha ona iha janeiru 2022 ne’e,” Manuel Ximenes Smith informa ba Agência Tatoli, iha nia knar fatin, Avenida Portugal, segunda ne’e.
Ekipa ne’e hamosu ona konkordánsia balun atu integra fakuldade arte indústria kreativa kulturál ba iha Fakuldade Turizmu iha UNTL, no ho ida-ne’e mak bele fasilita lalais no bele mós haree kona-ba realizaun polítika VIII Governu Konstitusionál nia hakarak, maske SEAK la konsege harii akademia maibé SEAK integra ona arte indústria kulturál ba iha UNTL atu sai nu’udar fakuldade Turizmu Arte Kreativa Indústria Kulturál.
Daudaun ne’e Ministériu Ensinu Superiór Siénsia no Kultura halo ona despaixu ba ekipa ne’ebé toma konta ba implementasaun Akademia Arte Kreativa Indústria Kulturál hodi servisu hamutuk ho UNTL.
Ekipa tékniku sira mak Diretór Nasionál Ensinu Supérior Universitáriu, Antonio Ribeiro Móniz hanesan membru, Reprezentante Dirasaun Jerál Ensinu Superior Siénsia, Afonso Sarmento, nu’udar membru, Cesilia Belo de Asis, Funsionáriu hosi Diresaun Arte no Kutura hanesan membru no ikus Rita Maria dos Reis, hanesan Asesora ba Dirasaun Jerál, Ensinu Supérior no Siénsia, ida-ne’e ekipa ne’ebé sei hetan despaixu hosi Ministru, MESKK rasik atu bele servisu hamutuk ho ekipa tékniku hosi Universidade Nasionál Timor Lorosa’e.
“Ekipa ne’e, ami sei estabelese kronograma kona-ba implementasaun atividade, hakarak ka lakohi ita fó ita-nia kronograma ne’e ho rigorozu tebes atu implementa lalais Fakuldade Turizmu Arte Indústria Kreativa Kulturál ne’e, peluemenus to’o fulan-abríl bele implementa ona iha UNTL. Ho ida-ne’e mak, ohin ami sei enkontru hamutuk ho ekipa tékniku hosi UNTL atu bele diskute kona-bá kestaun téknika,” Manuel Smith hateten.
Tuir nia, estabelesimetu Akademia ba Arte Indústria Kreativa Kulturál, ne’ebé mak ko’alia hahú iha 2015 no iha planu ida-ne’e SEAK integra ona iha planu estratejia dezenvolvimentu nasionál 11 no 30.
Signifika katak hosi 2011 to’o 2030 ne’e akademia ba arte ne’e tenke estabelese, maibé realidade to’o tempu ida-ne’e SEAK seidauk hetan espasu ida-ne’ebé di’ak, hanesan seidauk hetan atribuisaun rai ida-ne’ebé di’ak, seidauk iha preparasaun dokumentu ne’ebé di’ak no seidauk iha prepasaun rekursu umanu ne’ebé di’ak liga ba estabelesimentu akademia refere.
“Ita iha ita-nia bolseiru ne’ebé durante ne’e ita-nia Governu Timor-Leste haruka ba eskola iha Cuba, sira ne’ebé fila ona hamutuk ema na’in-16 ne’ebé sira mai ho área oioin hanesan balun iha área múzika, dansa no arte plástika. Maibé, ida-ne’e mós seidauk to’o tanba ita ko’alia kona-ba akademia ne’e buat boot ida. Entaun, mai iha VIII Konstitusionál ida-ne’e mós ita planu atu estabelese akademia ne’e seidauk harii, maibé ita prepara ona nia estatutu akademia ne’e rasik, maibé to’o ohin loron estatutu ba akademia ne’e mós seidauk finaliza,” nia dehan.
Nune’e, planu 2011 no 2030 Akademia ba Arte Kreativa Indústria Kulturál ne’e la taka dalan ba Governu foun ne’ebé mai, tanba instutuisaun Governu ne’e nia iha kompeténsia boot atu harii kualker instituisaun ne’ebé mak adera ba kompeténsia Governu.
“Signifika katak, ohin ita integra akademia ba iha UNTL no ba futuru Governu foun mós halo akademia foun ida, hanesan Akademia ba Indústria Kreativa Kulturál ne’ebé ho grau dala ruma la hanesan, tanba grau ida-ne’ebé ita integra iha UNTL ne’e ho grau lisensiatura,” nia hateten.
Jornalista : Nelia Fernandes
Editór : Cancio Ximenes
