DILI, 27 Abril 2026 (TATOLI)—Lenda moris múzika Indonézia, Iwan Fals, ho ninia orijinalidade ho lírika múzka popular ne’ebé haliis ba povu ka ema kbiit laek sira, sei anima povu Timor-Leste iha fulan-Maiu 2025.
TT TasiFest konvida múziku Indonézia, Iwan Fals, hanesan autór prinsipál ba edisaun 2026, reforsa pozisaun kulturál Timor-Leste nian iha Sudeste Aziátiku nia laran no apoia nia envolvimentu ne’ebé buras ho rejiaun ASEAN.
“Hahú loron 29–30 Maiu 2026, festivál ne’e sei simu lian muzikál ida husi Sudeste Aziátiku ne’ebé influente no dura liu iha Dili, hodi marka momentu signifikativu ida ba Timor-Leste tanba hametin ninia prezensa kulturál rejionál,” refere nota ne’ebé Agência TATOLI asesu, ohin.
Iwan Fals forma ona konxiénsia públika iha Indonézia no rejiaun luan liu durante dékada haat liubá. Ninia múzika ne’ebé koñesidu ho ninia komentáriu sosiál ne’ebé maka’as no rezonánsia emosionál ne’ebé kle’an inspira ona movimentu sira, liga komunidade o hetan rekoñesimentu nu’udar figura kulturál ida-ne’ebé importante liu iha ASEAN.
Nia kontinua halo digresaun barak iha Indonézia no Sudeste Aziátiku, hodi halo atuasaun ba públiku multijerasionál no atrai ema 10.000-resin. Ninia inkluzaun iha TT TasiFest koloka Timor-Leste nu’udar palku kulturál emerjente ida iha ASEAN nia laran, ne’ebé bele simu artista sira ho signifikadu rejionál boot.
Nu’udar Timor-Leste avansa ninia dalan iha ASEAN nia laran, partisipasaun husi artista sira hanesan Iwan Fals hala’o kna’ar xave hodi hametin diplomasia kulturál no identidade rejionál.
Ninia dezempeñu destaka nasaun nia kompromisu atu envolve ho ASEAN la’ós de’it ekonomikamente no polítikamente, maibé mós liuhusi espresaun kulturál ne’ebé fahe.
Aleinde interkámbiu kulturál, Iwan Fals nia prezensa mós apoia Timor-Leste nia pozisaun nu’udar destinu turizmu ba merkadu ASEAN nian.
Nia baze ne’ebé forte iha Indonézia tomak no iha rejiaun ne’e kria oportunidade ida-ne’ebé maka’as atu atrai vizitante rejionál sira, hasa’e konxiénsia kona-ba Timor-Leste nu’udar destinu viajen nian, no promove nasaun ne’e nia oferta úniku—husi ninia paizajen naturál no turizmu tasi nian to’o ninia patrimóniu kulturál riku no indústria kriativu sira.
Ho konetividade rejionál ne’ebé buras no hametin ligasaun entre Timor-Leste no merkadu ASEAN, inklui aumenta fluxu viajen no asesibilidade, TT TasiFest hala’o papél xave ida hodi koloka nasaun ne’e nu’udar sentru kulturál no turizmu emerjente iha Sudeste Aziátiku nia laran.
Vise Ministra ba ASEAN, Milena Rangel, hateten partisipasaun husi Iwan Fals iha TT TasiFest reprezenta pasu importante ida hodi hametin Timor-Leste nia integrasaun iha ASEAN nia laran. Inisiativa kulturál sira hanesan ida-ne’e reforsa ligasaun rejionál sira, hakle’an ligasaun ema ba ema no kontribui ba harii identidade ASEAN ne’ebé fahe liuhusi kriasaun no kolaborasaun.
Nune’e, Diretór Jerál Turizmu, Antonio da Silva, hateten eventu sira hanesan TT TasiFest esensiál hodi promove Timor-Leste nu’udar destinu turizmu iha merkadu ASEAN nia laran. Hodi atrai artista sira-ne’ebé rekoñesidu internasionalmente ho audiénsia rejionál ne’ebé forte, ita konsege hatudu nasaun ne’e nia rikusoin kulturál no naturál sira-ne’ebé úniku enkuantu dudu kreximentu vizitante no hametin ekonomia turizmu nian.
TT TasiFest iha objetivu atu sai hanesan plataforma regulár iha sirkuitu digresaun ASEAN nia laran, hodi kria oportunidade ba artista rejionál sira atu liga ho públiku foun enkuantu promove Timor-Leste nu’udar sentru ba kolaborasaun no interkámbiu kulturál.
Edisaun 2026 sei iha mós liña internasionál oioin inklui Guy Sebastian husi nasaun Austrália, Calema husi Portugal no Crimson husi Timor-Leste, hodi reforsa liután papél festivál nian hanesan ponte entre ASEAN, nasaun sira CPLP nian no merkadu múzika globál sira.
Billete sira agora fa’an ona liuhusi vendedór billete sira-ne’ebé autorizadu, iha stand TT TasiFest iha Timor Plaza, no online iha www.tasifest.tl. Kona-ba TT TasiFest TT TasiFest mak Timor-Leste nia festivál múzika, arte, no kulturál internasionál prinsipál, ne’ebé halibur artista lokál no globál sira iha selebrasaun kriatividade, komunidade, no interkámbiu kulturál.
Festivál ne’e sai hanesan plataforma ida hodi promove kultura Timor nian iha nivel internasionál, hametin parseria rejionál no globál no koloka Timor-Leste nu’udar destinu ba turizmu kulturál ho klase mundiál.
Kona-ba Fundasaun TasiFest Fundasaun TasiFest maka organizasaun iha TT TasiFest nia kotuk no inisiativa kulturál oioin tinan tomak nian. Fundasaun ne’e serbisu hodi promove arte no kultura timoroan, apoia ekonomia kriativa, no haburas kolaborasaun internasionál no interkámbiu kulturál, partikularmente iha rede ASEAN no CPLP nia laran.
TATOLI
