LIQUIÇA, 17 fevereiru 2022 (TATOLI)— Governu liuhosi Ministériu Saúde halo lansamentu ba vasina Pfizer doze dahuluk ba sidadaun ho idade 12 to’o menus 18 iha munisipiu Liquiça ne’ebé reprezenta ba Munisípiu hotu iha territóriu nasionál.
Lansamentu ne’e hala’o iha Eskola Koléjiu Santo Inacio Loiola Casait, kinta ne’e, ne’ebé partisipa másimu hosi Vise Primeira Ministra no Ministra Solidaridade Sosiál no Inkluzaun (MSSI) hanesan mós Koordenadora ba vasina kontra Covid-19, Armanda Berta dos Santos, Ministra Saúde Odete Belo, reprezentante parseiru internasionál sira iha Timor-Leste ne’ebé durante ne’e apoiu vasina no prevensaun kontra Covid-19.
“Ohin, ita halo lansamentu ba vasina Pfizer doze dahuluk iha Liquiça aumezmu tempu ba munisipiu sira hotu iha Timor laran tomak hahú ohin ba oin bele vasina ona labarik sira hosi idade 12 to’o menus 18 iha munisípiu sira,” Ministra Saúde, Odete Belo hateten iha nia intervesaun.
Vasina ne’e importante tebes ba labarik sira liu-liu estudante, nune’e tenke simu vasina ne’e hodi prevene surtu Covid-19 ne’ebé sa’e makas iha mundu inklui Timor – Leste.
“Estudante sira, imi ohin simu ona vasina ne’e, labele tauk, vasina ne’e la estraga imi nia vida maibé halo di’ak ba imi nia saúde, vasina ne’e hetan tulun hosi Estadu Unidu America (EUA) ne’ebé ita mós tenke agradese ba sira ba Austrália no nasaun sira hotu ne’ebé tulun ona ita iha vasina no prevensaun ba Covid-19,” nia agradese.
Iha fatin hanesan, Diretor Eskola Colejio Santo Inacio de Loiola Casait, Padre Isaias Abilio Caldas CJ , agradese ba Governu tanba fó konfiansa ba sira no hili sira nia eskola hodi halo lansamentu ba vasina Pfizer no vasina kedan doze dahuluk ba estudante sira.
“Ida ne’e hanesan konfiansa ida hosi Governu liu-liu Ministeriu Saúde husu ami atu ofrese fatin ne’e atu halo lansamentu vasina pfizer iha Liquiça. Ida ne’e halo ami kontente tanba konfiansa ne’ebé iha fó mai ami, nune’e motiva liu tan ami hodi halo servisu di’ak liu tan liu-liu iha área edukasaun,” nia dehan.
Eskola ne’e hahú hosi ensinu báziku to’o ensinu sekundáriu ho estudante hamutuk na’in-827 hosi númeru ne’e 60% feto no 40% mane.
“Alunu sira iha ne’e kuaze na’in-500 resin de’it mak simu vasina Pfizer ne’e tanba sira ne’ebé idade 18 ba leten balun simu ona AstraZeneca no balun mós simu ona Pfizer iha Dili entaun kuaze metade simu ona vasina,” Padre ne’e afirma.
Iha lansamentu ne’e estudante na’in-neen iha Colejio Loiola simu kedan vasina no sona direita hosi Ministra Saúde Odete Belo.
Estudante ne’ebé simu ona vasina iha lansamentu Rica Gusmão hateten, sente kontente tanba simu ona vasina Pfizer nune’e bele prevene an hodi virus covid-19.
“Bainhira ha’u simu ona vasina Pfizer sente kontente tebes tanba hosi vasina ne’e bele prevene ita hosi moras Covid-19, bainhira simu vasina ne’e ha’u la sente buat ida ne’ebé husu ba ha’u nia maluk sira tenke simu vasina ne’e,” nia rekomenda.
Vasina pfizer ne’e Timor -Leste hetan tulun hosi EUA hamutuk doze 100,620. Hosi númeru ne’e Dili halo ona lansamentu no vasina ona ba estudante sira no iha Munisipiu foin halo lansamentu.
Jornalista: Hortencio Sanchez
Editór : Florencio Miranda Ximenes
