HEADLINE, LEI, NASIONÁL

CAC introdús espasu online ba Deklarasaun Rendimentu Bens no Interese

CAC introdús espasu online ba Deklarasaun Rendimentu Bens no Interese

Lansamentu plataforma online ba Deklarasaun Rendimentu Bens no Interese, iha salaun Lalini Lariguto CNE, tersa (22/02). Imajen TATOLI/Egas Cristóvão

DILI, 22 fevereiru 2022 (TATOLI)–Komisaun Antí-Korrupsaun (CAC, sigla portugés), tersa ne’e, komemora aniversáriu ba dala-XII, ne’ebé iha biban ne’e ofisialmente lansa sistema plataforma online ba Deklarasaun Rendimentu Bens no Interese (DRBI).

Komisáriu CAC, Sérgio Hornai, hateten, inisiativa introdús espasu online ne’e atu komprimenta ba Lei Medida ba Prevensaun Kombate Korrupsaun, ne’ebé vigora ona.

Diretór Ezekutivu TIC Timor, I.P, Roberto Caetano de Sousa no Komisáriu CAC, Sérgio Hornai, ho akompañamentu Ministru Prezidénsia Konsellu Ministru, Fidelis Manuel Leite Magalhães, asina akordu plataforma online ba Deklarasaun Rendimentu Bens no Interese, iha salaun Lalini Lariguto CNE, Colmera, tersa (22/02). Imajen TATOLI/Egas Cristóvão

“Rejime ne’e ninia objetivu prinsipál  mak atu deteta no halo monitorizasaun ba aumentu rikeza hosi entidade kompetente instituisaun públiku Estadu, hanesan ema sira ne’ebé kaer kargu Ministru, Deputadu, Diretór Jerál, Xefe Departamentu, inklui asesór, ne’ebé sira-nia deklarasaun hahú hosi momentu ne’ebé sira ezerse knaar hanesan ajente ka responsável kargu instituisaun Estadu,” Komisáriu CAC hateten iha salaun Komisaun Nasionál Eleisaun (CNE, sigla portugés), Colmera.

Notísia relevante: Lei MPCC, kargu xefia aprezenta deklarasaun rikusoin

Nune’e, artigu 32 kona-ba períodu deklarasaun mensiona katak deklarante sira tenke aprezenta deklarasaun iha okaziaun hahú deklarasaun inisiál ne’e ba to’o loron-30, hafoin simu pose ba kargu ka hahú funsaun, deklarasaun anuál katak to’o loron 31 janeiru tinan tuir mai no kobre períodu korrespondente ba loron 01 janeiru to’o 31 dezembru, deklarasaun finál to’o loron-30 hafoin determinasaun serbisu kargu, no delarasaun pós ezersísiu katak anualmente iha tinan tolu tuirmai hafoin termina ezersísiu kargu.

Komísariu CAC, Sérgio Hornai. Imajen TATOLI/Egas Cristóvão

“Relasiona ho tipu deklarasaun sira ne’e, ajente funsionáriu públiku Estadu ne’ebé mak afetadu ba lei ne’e hakarak ka lakohi sira tenke presta deklarasaun ba autoridade. Ezemplu deklarasaun anuál hateten, ha’u simu osan ho montante hira no tinan-ida nia laran gastu hira inklui rai hira iha banku. Ida-ne’e atu halo kontrolu di’ak ba sistema Deklarasaun Rendimentu Bens no Interese,” nia esplika.

Diretór Ezekutivu TIC Timor, I.P, Roberto Caetano de Sousa no Komisáriu CAC, Sérgio Hornai, ho akompañamentu Ministru Prezidénsia Konsellu Ministru, Fidelis Manuel Leite Magalhães, asina akordu plataforma online ba Deklarasaun Rendimentu Bens no Interese, iha salaun Lalini Lariguto CNE, Colmera, tersa (22/02). Imajen TATOLI/Egas Cristóvão

Karik ba oin mak entidade kompetente hosi instituisaun públiku Estadu sira lakohi kumpre presta deklarasaunm mak sei hetan sansaun hanesan aplika koima, liuhosi notifika ba tezoru Ministériu Finansa atu ko’a sira-nia osan ho razaun la kumpre tempu ne’ebé mak iha.

Plataforma online ne’e lansa tanba CAC halo koordenasaun serbisu ho Ajénsia Teknolojia Informasaun no Komunikasaun, Institutu Públiku (TIC Timor, I.P).

Maski lansa ona plataforma online, maibé link atu asesu ba sistema ne’e seidauk nakloke ba públiku tanba sei dezenvolve liután tuir nesesidade.

Jornalista : Arminda Fonseca

Editora      : Julia Chatarina

iklan
iklan

Leave a Reply

iklan
error: Content is protected !!