DILI, 28 fevereiru 2022 (TATOLI)–Sekretáriu Estadu Protesaun Sivil (SEPS), Joaquim José Gusmão dos Reis Martins, informa, bazeia ba relatóriu to’o loron 27 fevereiru 2022, rejista ema 14 mak lakon vida no kanek ida durante dezastre naturál iha fulan-janeiru no fevereiru 2022.
“Mate ne’e na’in-neen hosi Baucau, ne’ebé momentu iha tinan foun iha asidente populasaun mout iha tasi, na’in-ida hakur mota. Iha Bobonaro iha janeiru nia laran mate na’in-haat, Ermera na’in-ida, Manatuto na’in-ida no Oé-cusse-rua, kanek ida ne’e iha Baucau,” Sekretáriu Estadu hateten hafoin ramata reuniaun ho Primeiru-Ministru, Taur Matan Ruak, iha Rezidénsia Farol, segunda ne’e.
Notísia relevante: SEPS koordena ho MS fó tratamentu médiku ba vítima inundasaun
Enkuantu, inundasaun ne’ebé akontese iha segunda (21/02) rejista vítima ne’ebé evakua ba sentru akollimentu Don Bosco hamutuk na’in-294 hosi uma-kain 80.
“Governu serbisu hamutuk ho Padre sira hodi fó asisténsia ba vítima dezastre naturál, durante loron tolu, hafoin ne’e iha kuarta (23/02) fornese ona ai-han matak, ne’ebé maka Padre sira iha Don Bosco mak organiza hodi tein,” Governante ne’e relata.
Segunda ne’e, SEPS halo fali avaliasaun, karik vítima balun hakarak fila ba sira-nia fatin, iha ekipa responsável bele lori hikas.
“Kona-ba avaliasaun uma sira ne’ebé hetan estragu liuliu iha postu administrativu Don Aleixo no Cristo Rei, munisípiu Dili, família afetadu hotu hamutuk 128, uma ne’ebé a’at totál haat, a’at natón tolu no a’at kama’an neen, restu uma hamutuk 105 ameasadu, signifika katak uma sira ne’e karik akontese tan inundasaun, bee bele lori hotu, nune’e tuir dadus ne’ebé iha, família hamutuk 128,” Sekretáriu Estadu dehan.
Dezastre naturál ne’ebé akontese iha munisípiu tomak, hanesan, anin sobu uma, ahi-han, inundasaun, no rai halai.
“Tanba ne’e rejista dezastre anin sobu uma uma 23, ahi han 45, boot liu mak iha Dili 36, bee-sae 201, boot liu iha Dili 125, rai-halai 47. Apoia ne’ebé fó ba família ne’ebé uma hetan estragu hamutuk 251, hosi totál ne’e, 212 mak hetan ona apoia no 125 mak iha prosesu nia laran,” nia subliña.
Jornalista : Antónia Gusmão
Editora : Julia Chatarina
