DILI, 07 marsu 2022 (TATOLI)–Ministériu Saúde (MS) no Komisaun Funsaun Públiku (KFP), segunda ne’e, fó pose no asina termu aseitasaun rekrutamentu públiku ba profisionál saúde hamutuk 33, kompostu hosi médiku espesialista 27 no tekniku aliadu saúde neen.
Biban ne’e, Ministra Saúde, Odete Maria Freitas Belo, enkoraja emposadu ne’ebé hanesan funsionáriu públiku tuan, maibé ho grau foun no hanesan funsionáriu foun bá tekniku aliadu saúde iha mahon MS atu servisu ho responsabilidade.
“Espera bele hetan susesu servisu asisténsia saúde tanba sei sura mós prestasaun servisu. Ministériu Saúde husu imi hanesan profisionál saúde bele halo servisu fó asisténsia saúde di’ak. Servisu ho loos, nakonu ho espíritu profisionalizmu responsabilidade tanba imi mak hanesan ekipa ne’ebé iha fatór determinante ba implmementasaun atividade ba ita-nia komunidade, nune’e ita hotu esforsu hodi hatan ba vizaun katak Ema timor-oan Saudável iha Timor-Leste ida Saudável,” Ministra hateten liuhosi ninia diskursu, iha salaun Palásiu Sinzas, Caicoli.
Notísia relevante: MS kontinua kontrata profisionál saúde 1.081 atende COVID-19
Governu husu atu sai entidade saúde ne’ebé badinas hodi buka hatene nune’e bele haburas koñesimentu, pratika klíniku espesializadu, no hatudu atitude servisu di’ak atubele fó rezultadu saúde di’ak ba komunidade.
Nune’e, to’o iha dezembru 2021, MS iha totál funsionáriu permanente hamutuk 5.149, kompostu hosi rejime jerál 1.208 no rejime kareira espesiál 3.941.
Aleinde ne’e, MS iha funsionáriu kontratu hanesan ajente administrasaun publika 317, ne’ebé kontratu profisionál saúde ba apoiu servisu kombate mitigasaun pandemia COVID-19 no programa Saúde na Família hamutuk 1.855, inklui mós kontratu termu sertu hamutuk 25.
“Haree hosi númeru funsionáriu ne’ebé iha Ministériu Saúde kontinua haforsa no sei aumenta nafatin rekursu umanu, liuliu iha área espesializadu hodi bele apoiu kuidadu servisu tersiáriu iha ospitál neen hanesan kuidadu ba tratamentu moras kardiovaskulár, kankru no seluk tan,” nia akresenta.
Iha fatin hanesan, Prezidente KFP, Fautino Cardoso, apresia inisiativa MS ne’ebé fó fiar ba KFP hodi fó pose ba profisionál saúde.
“Ami agradese ba MS ne’ebé fó konfiasa ba ami ohin hodi mai fó pose ba ita-nia médiku espesialista 27 no tékniku aliadu na’in-neen. Ida-ne’e hanesan pasu di’ak ba ita tanba antes ne’e ita-nia médiku espesialista menus loos, maibé ho ita boot sira-nia prezensa bele haforsa tan servisu médiku nian hodi fó atendimentu ba ita-nia komunidade,” nia dehan.
Médiku espesialista na’in-27 ba área sira hanesan kardiolojia horex, pulmonoljia, onkolojia, radiolojia horex, no seluk tan, ne’ebé sei serbisu iha munisípiu Maliana, Dili, no Covalima.
Enkuantu, tékniku aliadu na’in-hitu ne’e ba área hanesan médiku espesialista oftalmolojia, nefrolojia, intensiva no kardioljia, ne’ebé sei destaka iha Hospital Nasional Guido Valadares (HNGV).
Jornalista : Arminda Fonseca
Editora : Julia Chatarina
