HEADLINE, POLÍTIKA

PM orienta KAFI aselera rekupera estragu infraestrutura impaktu hosi dezastre naturál

PM orienta KAFI aselera rekupera estragu infraestrutura impaktu hosi dezastre naturál

Primeiru Ministru (PM) Taur Matan Ruak. Imajen Tatoli/Francisco Sony

DILI, 10 marsu 2022 (TATOLI)— Primeiru Ministru, Taur Matan Ruak, orienta ba ministériu relevante hamutuk ho orgaun sira ne’ebé toma konta ba infraestrutura atu aselera rekupera estragu sira impaktu hosi dezastre natural .

Xefe Governu hato’o kestaun ne’e bainhira lidera direta  enkontru alargada ho Konsellu Administrasaun Fundu Infraestrutura (KAFI), Vise Primeiru no Ministru Planu no Ordenamentu Interinu, Rui Gomes, Ministru Obra Públika Salvadór Eugenio Dos Reis Pires, Ministru Transporte no Komunikasaun, José Agustinho da Silva no Ajénsia Dezenvolvimentu Nasionál (ADN). 

Notísia relevante:  PM preokupa progresu rekuperasaun estragu infraestrutura impaktu dezastre naturál

Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Francisco Sony

“Iha enkontru alargada ne’e, Xefe  Governu orienta direta ba iha KAFI ho ninian komponente sira no órgaun servisu sira atu ezekuta projetu sira ne’ebé prevee  ona iha 2022 no mós haree liu ba projetu sira ne’ebé rezulta hosi kalamidade iha tinan kotuk ne’ebé seidauk halo rekuperasaun,” Ministru Prezidensia Konsellu Ministru (PCM, siglá protugés), Fidelis Manuel Leite Magalhães, hateten  ba jornaalista sira hafoin ramata enkontru alargada ne’ebe Primeiru Ministru halo ho KAFI iha Pálasiu Governu, kinta ne’e.

Xefe Governu preokupa ho progresu rekuperasaun estragu infraestrutura impaktu dezastre naturál, tanba haree ba ezekusaun iha verba fundu infraestrutura atinje de’it 26% iha tinan kotuk.

Nune’e, PM Taur orienta ba Ministru ne’ebé toma konta ba área infraestrutura nian atu hamutuk KAFI no AND atu rezolve kestaun sira ne’e iha tempu badak nia laran.

“Primeiru Ministru husu KAFI tenke halo esforsu lalais, hodi bele hetan solusaun ba kestaun sira liuliu halo rekuperasaun,” Governante ne’e akresenta.

Enkuantu, Ministériu Obra Públika identifika estragu sira durante dezastre naturál iha loron 04 abríl 2021 hamutuk 117 iha teritóriu laran tomak kompostu hosi estragu simples 40 no estragu komplexu 77, ho estimasaun kustu pur volta millaun $245.

Servisu emerjénsia ne’ebé tama nível kompleta ona ka atinje 100%, toma konta hosi empreza 37, ne’ebé projetu ualu deside halo serbisu normalizasaun voluntariamente, enkuantu seluk ho pagamentu no daudaun finaliza ona.

Servisu emerjénsia nível rua hamutuk ualu, balun kompleta, balun ein progresu no seluk iha faze preparasaun.

Estrada Kampung Alor kompleta 100%, ne’ebé projetu haat ninia prosesu iha Ajénsia Dezenvolvimentu Nasionál (ADN), ida Ponte Becusse iha prosesu preparasaun, ida Cantilever Ponte CPLP tama ona konkursu no ida Ponte Loes tama iha Unidade Jestaun Projetu (PMU, sigla inglés).

Servisu emerjénsia nível tolu hamutuk 17 iha faze investigasaun no preparasaun dezeñu, projetu rua haruka ona ba ADN, ne’ebé projetu 15 mak verifika ona no submete ba Konsellu Administrasaun Fundu Infraestrutura (KAFI), no servisu emerjénsia nível haat sei iha faze planeamentu.

Iha Orsamentu Jerál Estadu (OJE) 2022, Governu mós prevee ona orsamentu iha fundu infraestrutura hamutuk millaun $332 ba projetu kuaze 700-resin.

Notísia relevante:  MOP identifika estragu 117 impaktu hosi dezastre naturál

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!