COVALIMA, 14 marsu 2022 (TATOLI)—Administradór Munisípiu Covalima, Francisco de Andrade, enkoraja feto sira atu kontinua aprende hodi aumenta kuñesementu iha área oioin, nune’e bele asume kargu xefia iha ida-idak nia knar fatin.
Notísia Relevante: PM parabeniza loron mundiál feto no espera bele sai reflesaun
“Hahú ohin ba oin feto mós tenke aprende iha área oioin hodi aumenta kuñesementu, nune’e bainhira iha ona kapasidade Governu no ONG sira prontu envolve ita-boot sira iha kualker fatin no bele asume kargu xefia iha knar fatin,” Administradór ne’e hateten liuhosi diskursu bainhira selebra Loron Mundiál Feto ne’ebé mundu selebra iha kada loron 08 marsu, iha salaun administrasaun munisípiu Covalima, Kampung Baru, segunda ne’e.
Administrasaun Munisipál Covalima deside selebra loron mundiál feto iha segunda (14/03) ne’e, ne’ebé foti tema prinsipál “Igualdade Ohin ba Loron Oin ida-ne’ebé Sustentavél” ho sub-tema “Mai Rekuñese Feto Sira-Nia Lideransa ba Adaptasaun, Mitigasaun Responde hasoru Mundansa Klimátika atu Kria Futuru ne’ebé Sustentavél ba Ita hotu”.
Autoridade munisipál ne’e enkoraja feto sira atu-labele tauk nia parseiru mane (laen) sira tanba feto ho mane iha direitu ne’ebé hanesan, maibé dala barak mane sira la fó oportunidade ba nia parseiru feto (feen) sira.
“Ohin selebra loron mundiál feto iha ne’e, ita-boot sira tenke hatene igualdade no jéneru, feto ho mane iha direitu ne’ebé hanesan. Maibé, realidade, iha uma-laran ami mane la fó oporunidade ba imi feto sira servisu iha liur hanesan servisu iha institusaun públiku no ONG sira,” nia informa.
Diretór Centro Comunidade Covalima (CCC), Alberto de Jesus Barros reforsa, CCC hamutuk ho Administrasaun Munisipiu Covalima ho Community Based Rehabilitation Network Timor-Leste (sigla, inglés CBRNTL) hodi selebra loron mundiál feto, ho objetivu atu promove igualdade jéneru hodi fó espasu ba feto sira bele hetan oportunidade hanesan ho mane sira.
“Ita selebra de’it loron mundiál feto ba feto sira tanba haree ba kultura feto sira laiha lian, ho nune’e CCC la’ós selebra mesak maibé hamutuk ho administrasaun munisípiu Covalima no Community Based Rehabilitation Network Timor-Leste hodi selebra loron boot refere,” nia dehan.
Tanba ne’e, nia hateten, kada tinan CCC sempre selebra loron nasionál no mundiál feto iha de’it salaun CCC nian, maibé tinan ne’e selebra iha salaun administrasaun munisípiu Covalima tanba bazea ba observasaun hosi CCC nia iha ona mudansa signifikante.
Nia dehan, rezultadu hatudu katak CCC esforsu implementa programa oioin, feto sira iha Covalima hetan ona oportunidade hanesan ho mane liu-liu iha servisu fatin no mós hanesan dona de casa iha uma.
“Ami-nia observasaun iha terrenu feto barak mak servisu iha administrasaun munisípiu Covalima ne’ebé iha feto balun asume kargu diretór, xefe departamentu no implementasaun programa mão de obra ne’ebé feto ho mane servisu hamutuk,” nia hateten.
Iha selebrasaun ne’e, hetan partisipasaun masímu hosi feto protensiál sira iha munisípiu Covalima no líder komunitáriu sira. Orsamentu ba selebrasaun loron mundiál feto ne’e hamutuk $2,500.
Jornalista : Celestina Teles
Editór : Cancio Ximenes
