DILI, 15 marsu 2022 (TATOLI)– Prezidente Federasaun Voleiból Timor-Leste (FVTL), Inocencio Araújo da Silva, hateten hahú tinan kotuk prepara ona rekursu voleiból hodi fó formasaun ba treinadór no arbitrajen iha territóriu nasionál.
“Hosi tinan kotuk ita iha planu halo preparasaun ba rekursu liuliu iha baze, ne’e mak ita halo ona formasaun ba treinadór no arbitrajen ba voleiból iha munisipiu hotu,” dehan Inocencio ba Agência TATOLI iha nia servisu fatin Jinaziu Dili, tersa ne’e.
Programa ne’ebé FVTL realiza bazeia ba programa ne’ebé orienta hosi Sekretáriu Estadu Juventude no Desportu (SEJD) ne’ebé hakarak dezenvolve desportu hahú hosi baze.
“Ita agora kria ona rekursu hosi baze liuliu treinadór tanba durante ne’e ita nia treinadór sira iha nivél munisípiu la sufisiente, nune’e agora ita halo ne’e involve hotu Postu Administrativu sira mai tuir hotu atu bele prepara ita nia rekursu ho di’ak liután, atu prepara jogadór sira iha nivél baze hodi bele lori mai kompete iha nasionál bainhira jogu sira la’o,” nia esplika.
Kada Munisipiu formasaun ba treinadór hamutuk na’in-20, arbitrajen ema na’in-10, maibé daudau ne’e iha Munisipiu hitu de’it mak FVTL fó ona treinamentu no neen mak seidauk tuir planu sei realiza iha tinan ne’e.
“Formasaun ne’e nia progresu di’ak tanba iha munisipiu balun hanesan Lautem, Manatuto sira realiza jogu komunitáriu no utiliza ona ita nia rekursu hirak ne’e,” nia relata.
Munisipiu ne’ebé hetan ona formasaun ba treinadór no arbitrajen mak hanesan, Lautem, Manatuto, Viqueque, Liquiça, Covalima, Ermera no Aileu. Enkuantu seluk seidauk.
Notísia relevante: Liga Voleiból Sei Realiza iha Tempu Besik
Jornalista: Hortencio Sanchez
Editór : Florencio Miranda Ximenes
