DILI, 16 marsu 2022 (TATOLI)–Institutu Superior Cristal (ISC) daudaun ne’e ezekuta ona inzensaun propina semestre par (faze daruak) hamutuk 60% ba estudante 3.545, hosi totál subsídiu $475.445, ne’ebé Ministériu Finansa (MF) transfere ba konta bankária instituisaun.
Reitór ISC, Sebastião Pereira, hateten prosesu pagamentu la’o hela no sei to’o loron 30 abríl tinan ne’e maka foin entrega relatóriu finál ba Ministériu Ensinu Superior Siénsia no Kultura (MESSK).
“Ita bele konsidera prosesu pagamentu inzesaun propina ba estudante sira iha faze diskusaun, signifika seidauk ramata. Maibé kuandu to’o data ne’ebé termina estudante sira la mai halo tan konfirmasaun, ita sei devolve fali metade osan ba kofre Estadu,” Reitór Sebastião informa ba Agência TATOLI, iha Kampus ISC, Balide, tersa ne’e.
Notísia relevante: Inspesaun Jerál MESSK nota inzensaun propina estudante 66.106 la’o di’ak
Maski nune’e, Reitór otimista katak molok loron 30 abríl bele ezekuta ona to’o 80%, enkuantu 20% ne’ebé iha bele konsidera dadus hosi estudante finalista sira.
Prosesu pagamentu propina ba estudante semestre in-par no semestre par iha diferensa, hosi lista estudante faze daruak barak mak asesu, kompara ho faze dahuluk iha de’it estudante 40% mak asesu, tanba problema COVID-19 halo estudante barak mak tauk no deside fila ba munisípiu.
“Daudaun ne’e situasaun normaliza ona, maibé estudante barak mak sei hetan direitu ba subsídiu ne’e, enkuantu barak mak halo estájiu iha ospitál referál no sentru saúde sira iha munisípiu. Ami sei haree tempu hafoin eleisaun ne’e ramata sei lori lista to’o sira-nia fatin atu sira bele asina kona-ba direitu ba inzesaun propina ne’e rasik,” nia tenik.
Instituisaun tau liu prioridade ba estudante ativu tanba iha direitu atu hetan subsídiu propina ne’e, nune’e kuandu atinje ona 80% bele konsidera restante hanesan estudante sira ne’ebé gradua ona.
“Maski naran iha maibé sira sei la hetan direitu ba inzesaun propina, tanba tuir regra ne’ebé iha inzesaun propina fó de’it ba estudante ativu sira,” Reitór akresenta.
Jornalista : Tomé Amado
Editora : Julia Chataraina
