COVALIMA, 16 marsu 2022 (TATOLI)—Servisu Munisípal Asaun Sosiál (SMAS), durante trimestre dahuluk tinan ne’e, apoiu ona kaixaun 82 ba matebian família vulneravél, iha munisípiu Covalima.
“Servisu Munisípal Asaun Sosiál ba trimestre dahuluk tinan ne’e ami atende ona kaixaun 82 ba matebian família vulneravél ho medida kaixaun ne’ebé la hanesan,” Xefe Departamentu SMAS, Anacleto do Nascimento, informa ba Agência Tatoli, iha nia knar fatin, Suai Loro, kuarta ne’e.
Trimetre dahuluk ne’e, apoiu ona kaixaun 82 ho nia medida sira hanesan kaixaun medida 140-200 senti metru hamutuk 61 ho nia presu $ 70, kaixaun naton ho medida 90-130 senti metru hamutuk neen (6) ho nia presu $95.00, kaixaun ho medida kiik ho nia medida 60-80 senti metru hamutuk kaixaun 15 ho nia kaixaun ida presu $60.00
Tanba ne’e, iha tinan 2022 ba trimestre dahuluk Servisu Munisipál Asaun Sosiál apoiu ona kaixaun 82 ne’ebé gasta ona osan hamutuk $11,210.00
Kaixaun sira-ne’ebé mak fó apoiu ne’e iha munisípiu Covalima ne’ebé apoiu kaixaun barak iha postu administrativu Zumalai no Suai Vila, tanba sira besik atu asesu servisu munisipál Asaun Sosiál ba postu adminsitrativu seluk tanba dook hosi Suai Vila.
“Ita labele tula kaixaun mamuk ba iha postu administrativu sira bainhira lori ba tenke husu autorizaun hosi Administradór Munisípiu Díli.” Anacleto relata.
Servisu Munisípal Asaun Sosiál (SMAS) atu apoiu kaixaun ho nia kritériu presiza matebian nia kartaun eleitorál no família matebian nia kartaun eleitorál no deklarasaun hosi xefe suku, bainhira mate iha óspital ajuda kaixaun no transporta mate-isin ba to’o iha nia knua.
“Maibé família sira husu de’it kaixaun, entaun sira buka transporte rasik hodi transporta kaixaun,” nia dehan.
Bazea ba dekretu-lei númeru 22/2008 providu karreta funeráriu labele tula kaixaun mamuk ba família matebian nia uma, maibé bainhira tula ne’e hetan autorizasaun hosi Administradór munisípiu Covalima.
Karreta funeráriu ne’ebé mak durante ne’e transporta mate-isin ba iha Postu Administrativu pertense iha Munisípiu Covalima hamutuk tolu (3) maibé karreta ida labele lori ona postu administrativu sira sei halo manutensaun, ida foun sei halo rodajen no daudaun ne’e karreta funeráriu ida mak transporta mate-isin ba postu administrativu sira.
“Karreta funeráriu iha munisípiu Covalima tolu (3) de’it sei la sufisiente, maibé Servisu Munisípal Asaun Sosiál (SMAS) tau ona iha planu no sei sosa karreta funeráriu ho fazeadamente,” nia dehan.
Jornalista : Celestina Teles
Editór : Cancio Ximenes
