iklan

NASIONÁL, ELEISAUN, HEADLINE, LAUTEIN

Lere iha esperansa boot manán iha Eleisaun Prezidensiál

Lere iha esperansa boot manán iha Eleisaun Prezidensiál

Kandidatu Prezidente Repúblika independente ba períodu 2022-2027, Tito da Costa Cristóvão ‘Lere Anan Timur’, hamutuk ho espoza, Cidália Mesquita Ximenes, Hafoin ezerse direitu votu iha sentru votasaun sede suku Caenlio, postu Iliomar, sábadu (19/03). Imajen TATOLI/Arminda Fonseca

LAUTÉM, 19 marsu 2022 (TATOLI)–Kandidatu Prezidente Repúblika (PR) independente ba períodu 2022-2027, ho númeru sorteiu 08, Tito da Costa Cristóvão ‘Lere Anan Timur’, otimista no iha esperansa boot sei manán iha Eleisaun Prezidensiál.

Kandidatura ne’e ezerse direitu votu iha sábadu dadeer tuku 08:35, iha sentru votasaun sede suku Caenlio, postu administrativu Iliomar, munisípiu Lautém.

“Ba eleisaun tinan ne’e ha’u mós kandidatu ida, hanesan uluk funu, ha’u iha esperansa katak manán funu no agora mós ha’u iha esperansa atu manán, maibé manán mós ukun, lakon mós ukun,” Kandidatu PR Lere Anan Timur hateten ba Agência TATOLI iha sede suku Caenlio, hafoin ezerse nia direitu votu.

Notísia relevante: Lere hamutuk sarani Iliomar partisipa misa agradesimentu ba kampaña

Iha biban ne’e, nia dehan, karik manán sei realiza kompromisu sira ne’ebé hato’o ona durante kampaña iha semana rua nia-laran.

“Durante ha’u-nia kampaña, ha’u hato’o kompromisu la barak, hanesan haree estabilidade nasionál ne’ebé presiza ultrapasa impase polítika, ita agora moris daudaun durante kuaze tinan 20 resin. Ha’u promote organiza arte-marisiál iha nível nasionál hodi kria estabilidade,” nia akresenta.

Aleinde ne’e, hanesan veteranu ida, sei fó prioridade ba restu mortál sira ne’ebé daudaun tau iha uma privadu no armazen sira.

“Ha’u promete ona, atu lori Dom Martinho Lopes nia restu mortál hosi Portugál no hanesan mós saudozu Vicente Manuel Reis ‘Sahe’ iha Bucoli, ha’u tenke haloot uluk iha Jardim dos Herois Metinaro,” Lere kompromete.

Notísia relevante: Lere tau prioridade haloot restu mortál iha fatin dignu

Nune’e, kandidatura númeru sorteiu 08 ne’e hato’o nia mensajen ba povu iha territóriu tomak ne’ebé ohin idaidak ezerse votu, katak la’ós tinan ida-ne’e mak foin halo eleisaun, maibé Timor-Leste hala’o ona eleisaun lubuk ida, tanba ne’e entidade hotu tenke kontribui ba pás no estabilidade nune’e eleisaun bele la’o ho susesu.

“Ha’u apela ba joven patriota hotu atu mantein kalma nafatin, tanba iha kandidatura hamutuk 16, ida de’it mak sei manán, maibé ida ne’ebé manán nafatin timor-oan mak ukun, nune’e joventude sira tenke hakmatek no hatudu nafatin matenek, tanba futuru nasaun iha imi-nia liman,” nia dehan.

Populasaun hosi suku Caenlio forma iha sentru votasaun, hamriik no hein tuituir malu iha liña laran, hahú hosi tuku 05:00 madrugada, maski sentru votasaun foin loke iha tuku 07:00 to’o 15:00.

Situasaun iha sentru votasaun Caenlio kontroladu tanba hetan seguransa másimu hosi Polísia Nasionál Timor-Leste (PNTL).

Jornalista : Arminda Fonseca

Editora     : Julia Chatarina

iklan
iklan

Leave a Reply

iklan
error: Content is protected !!