BOBONARO, 22 marsu 2022 (TATOLI) – Sekretáriu Autoridade Munisípiu Bobonaro, João Fátima do Carmo, agradese ba partispasaun komunidade iha eleisaun prezidensiál tinan 2022 tanba la’o ho hakmatek.
Tuir dadus hosi Sekretariadu Tékniku administrasaun eletorál (STAE) eleitór ne’ebé elizivel hosi idade 17 ba leten ne’ebé iha kartaun eleitorál mai rejista hamutuk 70,283 hosi númeru nne’e 379 vota iha sentru paralalu no totál votante 69,904.
Hosi numeru ne’e rezultadu apuramentu munisípiu hatudu katak votante ne’ebé mai vota iha loron 19 fulan marsu hamutuk 54,332 kompostu hosi mane 27,676 no feto hamutuk 26,656.
Purtantu hosi númeru ne’e mós iha eleitór na’in 15,572 mak la konsege ezerse sira-nia direitu vota iha loron 19 marsu 2022.
“Ita-nia taxa partisipasaun foin lalais iha eleisaun ne’e ita observa rezultadu apuramentu menus natoon de’it tanba ita-nia eleitór 92% mak mai vota, ne’e duni hanesan autoridade agradese tebes ba ita-nia komunidade sira-nia vontade, maske balu la’o dook maibé konsege partisipa iha festa demokrasia ne’e,” nia informa ba Tatoli, iha Maliana, tersa ne’e.
Nia kongratula komunidade sira-nia kontribuisau tomak iha eleisaun prezidensiál ne’e tanba munisípiu Bobonaro la rejista krime eleitorál iha sentru votasaun 130 no estasaun votu 150 ne’ebé establese iha postu administrativu neen.
Munisípiu Bobonaro iha aldeia 192, suku 50, postu administrativu neen mak hanesan Atabae, Balibo, Cailaco, Maliana, Bobonaro no Lolotoe.
Jornalista : Sérgio da Cruz
Editór : Evaristo Soares Martins
