COVALIMA, 25 marsu 2022 (TATOLI)—Servisu Munisipál Risku Dezastre Naturál Munisípiu Covalima, hahú fulan janeiru to’o marsu ne’e, rejista ona vitima dezastre naturál iha postu administrative sira iha munisípiu Covalima.
“Hahú fulan janeiru to’o marsu tinan ne’e, ami rejista ona vítima dezastre naturál hamutuk uma kain 38 iha postu administrativu sira-ne’ebé pertense hosi munisípiu Covalima,” Diretór Servisu Munisípal Risku Dezastre Naturál Covalima, Quintino da Costa, informa ba jornalista iha salaun MSSI, suku Suai Loro, sesta ne’e.
Vítima uma kain 38 ne’ebé anin sobu sira-nia uma ne’e, Servisu Munisipál Risku Dezastre Naturál Covalima ho nia parseiru sira halo ona intervensaun hodi fó apoia emerjensia ba sira.
Daudaun ne’e, hamutuk ho parseiru sira iha área dezastre naturál, hala’o enkontru armonizasaun atu halo intervensaun bainhira mosu dezastre naturál to’o halo evakuasaun ba vítima sira iha fatin seguru.
Tanba ne’e, oras ne’e daudaun Servisu Munisípal Risku Dezastre Nuturál halo ona idetifikasaun ba fatin sira-ne’ebé mak risku ba dezastre naturál hanesan postu Administrativu Suai Vila pertense iha suku Beco, Aldeia Bonuk, postu administrivu Maucatar, suku Ogues no postu administrativu sira seluk sei halo identifikasaun.
Ho nune’e, nia fó hanoin ba komunidade nafatin atensaun bainhira tempu udan no anin boot karik, prioridade primeiru salva sira-nia dokumentu, prepara hahan no salva sira nia an.
Bazea ba esperensia iha tinan 2013, dezastre naturál ne’ebé akontese iha suku Suai evakua komunidade sira mai iha EBC Suai loro, komunidade suku Camanasa halo evakuasaun ba iha EBC Ladi no identifika ona sentru evakuasaun permanente iha eskola sekundariu jerál públiku Seran Kotek.
Jornalista : Celestina Teles
Editór : Cancio Ximenes
