DILI, 25 marsu 2022 (TATOLI)—Prezidente Interinu Conselho de Imprensa (CI), Expedito Dias Ximenes, hateten programa “Liberdade Imprensa no Ha’u-Nia Liberdade” ne’e atu haforsa liután knar prinsipál CI nian ne’ebé hatuur iha lei komunikasaun sosiál hodi promove liberdade espresaun no liberdade imprensa.
Nia hateten, ohin Conseelho de Imprensa (CI) ho Rádiu Televizaun Timor-Leste, Empreza Públiku (RTTL, E.P) kontinua asina nota entendeimenu (MoU, Memorandum of Understanding) hodi kontinau halo kooperasaun ne’e ba oin.
“Ami hein katak RTTL sei nafatin sai parseriu ne’ebé konstrutivu no hein katak sai parseriu krítiku iha ita-nia kooperasaun ne’e. Krítiku tanba CI hakarak hato’o no saida mak hakarak hosi RTTL ,E.P nune’e sai diskusaun ba iha nível programa,” Prezidente Interinu CI ne’e hateten hafoin asina nota entendimentu ho RTTL, E.P, iha salaun CI Quintál Boot, Dili, sesta ne’e.
Prezidente Interinu CI hato’o agradese nafatin ba disponibilidade Rádiu Televizaun Timor-Leste, Empreza Públika (RTTL, E.P) ne’ebé hakarak hodi kontinua halo kooperasaun ho CI iha órgaun komunikasaun sosiál.
Kooperasaun iha dimensaun rua, ida mak kontaktu ne’ebé CI halo kontinua nafatin no rua mak konteudu hosi kooperasaun ida-ne’e ho nia efeitu pozitivu ba iha maluk sira-ne’ebé servisu iha órgaun komunikasaun sosiál.
Prezidente RTTL, E.P, José António Belo, haktuir kooperasaun ne’e la’ós foin hahú maibé kooperasaun kontinuasaun ne’ebé hala’o ona iha tinan kotuk.
“Ami agradese ho kooperasaun ida ne’ebé kontinuasaun hosi kooperasaun ne’ebé eziste ona, nune’e RTTL hakarak agradese ba apoiu hosi Konsellu Imprensa ba akordu ne’ebé ami asina ona iha tinan 2021. Mezmu iha difikuldade oioin maibé konsege ezekuta no fó espasu nafatin ba CI hodi kontinua uza espasu iha kualker momentu ba RTTL hodi bele disemina ka fó sai informasaun ba públiku,” José Belo hateten.
Tanba, tuir nia, tinan kotuk bainhira selebra loron liberdade imprensa no loron 15 outubru nian iha Balibo, RTTL nota katak mesmu preparasaun haree ladún másimu maibé ninia rezultadu pozitivu.
Nune’e, koordenasaun entre RTTL, E.P ho CI lori rezultadu ida-ne’ebé pozitivu tebes, tanba ho kooperasaun refere públiku tomak bele asesu informasaun liuhosi prograa ne’e.
Jornalista : Francisco Sony
Editór : Cancio Ximenes
