DILI, 28 marsu 2022 (TATOLI)-Sentru Nasionál Chega (CNC-sigla portugés) ho Radiu Televizaun Timor-Leste, Empreza Públika (RTTL,E.P), segunda ne’e, asina ona akordu kooperasaun institusionál hodi divulga informasaun kona-ba luta libertasaun nasionál ba públiku.
Akordu ne’e asina diretamente husi Diretór Ezekutivu Centro Nacional Chega, Hugo Maria Fernandes, ho Prezidente Konsellu Administrasaun RTTL, E.P, José António Belo iha Salaun CNC Balide Dili.
Diretór CNC ne’e esplika, parte rua asina ona akordu ne’e iha tinan tolu liubá maibé ohin termina ona hodi kontinua renova tan ba tinan tolu hahú 2022 to’o 2024.
Objetivu husi akordu ne’e maka atu utiliza espasu husi kanál RTTL,E.P nian hodi fó sai informasaun ba públiku ne’ebé liga povu kiik sira-nia partisipasaun iha luta ba independensia nasionál.
Tanbá, durante ne’e, mídia fó ona espasu ba lidér sira hodi konta sira-nia istoria pasadu maibé povu kiik sira barak maka seidauk to’o ohin loron seidauk konta sira-nia istória luta ba públiku atu hatene.
“CNC ho RTTL hatu’ur kooperasaun ida ne’e oinsá mak atu dignifika, atu fó valórizasaun ba ema hotu-hotu nia kontribuisaun iha luta ida ne’e,” nia dehan.
Ba tinan ida ne’e, nia dehan CNC ho RTTL,E.P sei implementa pakote tolu husi akordu ne’e, dahuluk maka programa talk show ka live talk show.
“Tanba, ita hahú iha marsu ba oin ne’ebé mak komponente ne’e ita bele ko’alia kona-bá programa CNC ni’an, maibé barak orsida sei ko’alia kona-bá ema ne’ebé mak partisipa ativamente iha luta ida ne’e,” nia informa.
Daruak, komemorasaun eventu istóriku sira, tanbá tinan-tinan CNC sempre organiza komemorasaun iha eventu istóriku hanesan viólasaun direitu umanu sira iha masakre Santa Cruz, Igreza Liquiça no Igreza Suai.
“Maibé, iha ita-nia istória barak ne’ebé ema nunka hatene entaun ida ne’e nu’udar dalan ida ita atu divulga no fahe informasaun katak, iha luta ba ukun rasik aan ne’e iha ema barak mak mate, maibé ita seidauk halo rejistu hotu-hotu ba sira-nia partisipasaun,” Hugo Maria Fernandes hateten.
Kona-bá rejistu sobrevivente sira, Diretór Ezekutivu CNC ne’e klarifika CNC rejistu ona sobrevivente hamutuk rihun rua resin.
CNC foin atinje númeru sobrevivente rihun 2-resin, tanba depois mandatu CAVR nian remata, laiha instituisaun ida maka asume mandatu ne’e.
“Entaun Sentru Chega hari’i filafali iha 2017 no 2018 ita foin organiza filafali no agora ita foin komesa halo rejistu foun, ida ne’e la sukat mós ho halo fali verifikasaun ba dadus ne’ebé CAVR kolekta ona liu rihun 10, nune’e verifikasaun ne’e importante tanbá depois tinan 10 karik balun mate ona, entaun se ita bele hateten ita rejista rihun 12-resin iha ne’e,” nia hateten.
Iha biban hanesan Prezidente Prezidente Konsellu Administrasaun RTTL, E.P, José António Belo, akresenta ho onra RTTL, E.P ho CNC selebra memorandu entendimentu ida atu kontinua filafali memorandu ne’ebé iha ona antes ne’e.
“Tuir ami-nia haree katak, RTTL hanesan orgaun públiku ida, média estatál ida ami iha dever atu bele hala’o ami-nia kna’ar hodi bele apoia orgaun públiku sira seluk, nune’e bele dezamina informasaun ba públiku,” nia katak.
Jornalista:Nelia Fernandes
Editór :Agapito dos Santos
