DILI, 30 marsu 2022 (TATOLI)— Diretór Jerál iha Sekretáriu Estadu Terras no Propriadade (SEPT), Rodrigue Mendonca, informa ekipa Diresaun Nasionál Terras no Propriedade (DNTP) hahú sukat rai Estadu ne’ebé utiliza hosi empreza ENSUL Engenharia hodi konstrui edifisiu Dili Financial Business Center (DFBC).
“Ami nian ekipa iha ona terreñu atu halo hela levantamentu ba rai Estadu ne’ebé durante tinan barak empreza ENSUL uza halo investimentu ba konstrui edifisiu Dili Financial Business Center (DFBC),” Diretór Jerál SETP ne’e hateten ba Agência TATOLI iha knar fatin Colmera-Dili, kuarta ne’e.
Notísia relevante: Aban, DNTP hahú levantamentu rai iha fatin konstrusaun edifísiu DFBC
Levantamentu ba rai Estadu ne’e importante atubele halo relatóriu ne’ebé maka ho loloos, hafoin submete Ministériu Justisa hodi bele ofisializa akordu arrendamentu, nune’e empreza ENSUL bele hala’o pagamentu kada-fulan.
“Levantamentu ne’e, ami sei finaliza minimu loron tolu no másimu semana ida tanba ita bo’ot hatene na’in ba Empreza ENSUL deklara ona katak prontu koopera ho Ministériu Justisa. Nune’e ha’u hanoin prosesu levantamentu ne’e laiha problema,” Diretór Jerál ne’e garante
Rodrigue Mendonca, afirma seidauk bele fó sai rezultadu provizóriu ba levantamentu tanba sei iha hela prosesu nia laran.
Ekipa hala’o levantamentu ba rai Estadu ne’e ho baze ba Lei númeru 1/2003 no Dekretu-Lei númeru 19/2004, kona-ba propriedade Estadu no kobra arrendamentu.
Levatamentu ba rai Estadu ne’e ho objetivu atu anexu akordu arrendamentu entre Estadu Timor-Leste ho empreza ENSUL atu kada fulan bele halo pagamentu arrendamentu.
Empreza ENSUL Engenharia hosi Portugál hala’o serbisu iha Timor-Leste dezde 2000, asina kontratu atu harii DFCB iha tinan-2012 no lansamentu ba konstrusaun ho fatuk-dahuluk realiza iha loron 16 dezembru 2013.
Konstrusaun Dili Financial Business Center (DFBC) ka Sentru Negósiu no Finansa ne’e pertense ba empreza ENSUL nian, ne’ebe lokaliza iha Kolmera, ho dimensaun 16.000 m².
Daudaun ne’e konstrusaun atinje ona andar-15 ho 60%, ho kustu orsamentu millaun $30 no obra ne’e sei ramata iha tinan-2023 nia rohan.
Notísia relevante: Tempu besik, MJ formaliza akordu arrendamentu ho empreza ENSUL
Jornalista: Natalino Costa
Editora : Florencio Miranda Ximenes
