DILI, 30 marsu 2022 (TATOLI)— Supremu Tribunál ba Justisa (STJ) liuhosi Tribunál Rekursu (TR), kuarta ne’e, anúnsia rezultadu númeru sorteiu ba kandidatu Prezidente Repúblika períodu 2022-2027 na’in-rua ne’ebé hakat ba segunda volta.
Iha rezultadu dada númeru sorteiu ne’e, kandidatu Prezidente Repúblika José Ramos Horta, ho númeru sorteiu 1 (ida) no Francisco Guterres Lú Olo ho númeru sorteiu 2 (rua).
“Ida ne’e maka rezultadu dada sorteiu ba kandidatu Prezidente Repúblika nain-rua ne’ebé hakat ba eleisaun segunda volta. Nune’e José Ramos Horta, hetan númeru sorteiu 1 (ida) no Kandidatu Prezidente Francisco Guterres Lú Olo ho númeru sorteiu 2 (rua),” Prezidente Tribunál Rekursu, Deolindo do Santos anunsia bainhira prezide sermonia dada númeru sorteiu ba Kandidatu Prezidente Repúblika nain-rua iha salaun TR, Caicoli-Dili.
Notísia relevante: Tribunál Rekursu deside kandidatu Horta no Lú Olo hakat ba segunda volta
Hafoin dada sorteiu, Prezidente Deolindo informa númeru sorteiu ne’e mak sei komunika ba Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE,sigla Portugés) atu kontinua ba prosesu imprensaun bulletin de votu.
Biban ne’e, PTR mós husu ba ekipa susesu kandidatu PR nain-rua hala’o atividade kampaña eleitorál tuir kalendáriu kampaña eleitorál nian.
“Husu ba boot atu tuir saida maka iha lei eleitorál haruka no tuir kalendáriu kampaña,” nia akresenta.
Antes ne’e, Tribunál Rekursu (TR), valida rezultadu apuramentu nasionál iha primeira volta eleisaun prezidensiál no deside kandidatu José Ramos Horta no Francisco Guterres Lú-olo hakat ba segunda volta.
Akordaun ne’e asina hosi juíz koletivu Jacinta Correia da Costa no Duarte Tilman Soares, ne’ebé konfirma rezultadu apuramentu ba votu efeitu ne’ebé realiza iha Timor-Leste no diáspora hosi Komisaun Nasionál Eleisaun (CNE,sigla Portugés).
Juíz koletiva deside laiha kandidatu ida maka hetan votu metade 50%+1 tanba ne’e mak laiha kandidatu entre na’in-16 maka manán absoluta. Nune’e iha kandidatu Prezidente Repúblika na’in-rua hanesan José Ramos Horta no Francisco Guterres Lu-Olo mak bele hakat ba segundu volta eleisaun Prezidensiál períodu 2022 to’o 2027.
Tanba, kandidatu na’in-rua mak hetan votu barak liu tuir lei artigu 76 Konstituisaun Repúblika Demokrátiku Timor-Leste no lei eleisaun prezidensiál artigu 48.
Bazeia ba akordaun final ba rezultadu eleisaun prezidensiál períodu 2022 too 2027, kadidatu Prezidente Repúblika ne’ebe hetan votu barak liu maka, José Ramos Horta ho númeru sorteiu 16 ho votu 303.477 (46,6%), Francisco Guterres Lu-Olo ho votu 144.282 (22,1%), Armanda Berta dos Santos 56. 690 (8,7%), Tito da Costa Cristovão “Lere Anan Timur” 49.314 (7,6%), Mariano Assanami Lopes Sabino 47.334 (7,3%), Anacleto Bento Perreira 13. 205 (2,0%).
Martinho Germano da Silva Gusmão 8.598 (1,3%), Hermes da Rosa Correia Barros 8.030 (1,2%), Maria Helena Lopes de Jesus Pires 5.430 (0,8%), Isabel da Costa Ferreira 4.219 (0,6%), Felizberto Araújo Duarte da Silva 2.709 (0,4%), Constancio da Costa Pinto ‘Terus’ ho votu 2.520 (0,4%), Rogerio Tiago de Fatima Lobato 2.050 (0,3%), Virgilio da Silva Guterres ‘ Lamukan’ 1.720 (0,3%), Antero Bendito da Silva 1.562 (0,2%) no Maria Angela Freitas da Silva 711 (0,1)%.
TR mós halo verifikasaun ba totál eleitór ne’ebé partisipa iha eleisaun prezidensiál iha 19 marsu hamutuk 664.106, hosi eleitór ne’ebe rejistradu 856.613. Enkuantu votu validu 651.859 (98,16%), votu branku 3.743 (0,56%), votu nulu 8.386 (1,26%), votu rejeitadu 65 (0,01%).
Notísia relevante: CNE submete ona rezultadu apuramentu nasionál ba Tribunál Rekursu
Jornalista: Natalino Costa
Editór : Florencio Miranda Ximenes
