DILI, 07 abril 2022 (TATOLI)—Fundu Dezenvolvimentu Kapitál Umanu (FDCH, sigla portugés) entrega bolsa estudu ba estudante 95, hanesan parte ida hosi programa ‘Bolsa Hakbiit’, hodi kontinua estudu iha Instituisaun Ensinu Superiór Cristal (ISC).
Nune’e, FDCH realiza asinatura akordu no entrega Bolsa Hakbiit ba bolseiru 95 iha ISC iha salaun intitutu iha Balide, kuarta (06/04).
“Bolseiru sira sei hala’o estudu iha Fakuldade Edukasaun na’in-72, ne’ebé sei fahe ba Departamentu Biolojia na’in-12, Departamentu Fízika na’in-11, Departamentu Lian Portugés na’in 25, Departamentu Matemátika na’in-lima no Departamentu kímika na’in-sia,” refere nota ne’ebé Agência TATOLI asesu, kinta ne’e.
Notísia relevante: MESSK loke vaga 1.000 programa bolsa hakbiit iha tinan 2022
Nune’e mós, bolseiru na’in-23 seluk integra iha Fakuldade saúde, sei hala’o estudu iha Departementu Parteira na’in-11 no Departementu Infermajen na’in-12.
Enkuantu, seremónia asina kontratu simbólika ne’e hosi bolseiru sira no hetan vistu nu’udar testemuña hosi Reitór ISC, Sebastião Pereira, no sei entrega mós ba Diretór Ezekutivu FDCH, Cristóvão dos Reis, hodi asina.
Hafoin ramata asina kontratu ho estudante sira, Xefe Departamentu Mídia no Relasaun Públika, Maximiano Boavida Pereira, ne’ebé reprezentante Diretór Ezekutivu FDCH entrega direita estudante bolseiru Bolsa Hakbiit sira ba ICS, ne’ebé simu direta hosi Reitór ISC, Sebastião Pereira no akompaña hosi Prezidente Ezekutivu Fundasaun Cristal, Agostinho dos Santos.
Atividade ne’e partisipa hosi Vise-Reitór ISC, Jacinto de Oliveira Junior, Xefe Departamentu ISC, Dosente inklui estudante Bolsa Hakbiit ba etapa dahuluk iha tinan 2021 inklui estudante Bolsa Hakbiit tinan 2022 hamutuk 95.
Jornalista : Tomé Amado
Editora : Julia Chatarina
