DILI, 11 abríl 2022 (TATOLI)—Diretora Nasionál Administrasaun no Finansa, Ministériu Solidariedade Sosiál no Inkluzaun (MSSI), Rosa da Costa Gomes, hateten iha trimestre dahuluk ne’e (janeiru-marsu) MAKLN ezekuta OJE 2022 atinje ona 24%.
Notísia Relevante: OJE 2022 millaun $92,6 ba MAKLN aprovadu iha espesialidade
“Ami-nia ezekusaun primeiru trimestre ba tinan ne’e ita atinje 24% ($23.575.170,59), hosi totál osan ne’ebé prevee hamutuk $99.684.114,” Diretora Rosa hateten ba Agência TATOLI, via WhatsApp, ohin.
Hosi osan $23.575.170,59 (24%), nia dehan, ezekuta ba kategória saláriu no vensimentu hamutuk $168.678,13 (23%) no osan ne’ebé mak hela $562.447,87, bens servisu $694.595,36 (19%) ho osan hela $2.885.532,64, kapitál menór halo ona kompromisu maibé seidauk realiza.
KOna-ba kapitál dezenvolvimentu, diretora ne’e hateten, osan ne’e Parlamentu Nasionál (PN) muda hotu ba transferénsia públika hamutuk $22.711.897,10 (24%) ho osan hela hamutuk $72.557.762,90.
Atividade no programa sira-ne’ebé mak MAKLN halo iha trimestre dahuluk nian ne’e mak rejistu programa bolsa estudu ba veteranu nia-oan sira no mós kona-ba verifikasaun dadus veteranu rejistadu 2009.
“Kona-ba bolsu estudu ba veteranu sira-nia oan, ami rejistu hamutuk ema 1.548 no rejistu taka ona iha loron 22 marsu 2022. Ami sei halo verifikasaun fali ida-ne’ebé tuir kriteria mak ami sei selu. Tuir planu ami sei selu iha terseiru trimestre,” nia dehan.
Nia dehan, iha trimestre daruak sei kontinua halo verifikasaun dadus veteranu rejistadu 2009 ne’ebé tuir plabu sei komesa iha fulan-juñu tinan 2022.
Notísia Relevante: Tinan 2022: MAKLN atribui bolsa estudu ba veteranu nia oan 1.300
Jornalista : Osória Marques
Editór : Cancio Ximenes
