DILI, 21 abril 2022 (TATOLI)—Ministériu Petróleu no Minerál (MPM) ezekuta ona Orsamentu Jerál Estadu (OJE) 2022 ho montante $260.038,29 (2%) iha trimestre dahuluk (janeiru to’o marsu) hosi totál alokasaun $82.620,903.
Hosi totál orsamentu alokadu, fahe ba kategoria saláriu no vensimentu $553.702 ezekuta ona $99.160,08 (18%) balansu sei iha $454.541.92, bens no servisu hamutuk $10.767,200 ezekuta ona $160.878,21 (1%) sei iha balansu $10.606.321,79.
Notísia relevante: MPM presiza tan adisionál $45,2 ba OJE 2022
“Bens no servisu foin atinje 1% tanba orsamentu boot, ami atu uza halo arrendamentu,” Diretora Administrasaun no Finansa hosi MPM, Ana Paula de Jesus Araújo, informa ba Agência Tatoli, iha ninia knaar fatin, Bebora, kinta ne’e.
Tinan ne’e MPM la aloka osan iha kategoria kapitál dezenvolvimentu, maibé aloka ba iha kategoria transferénsia públika ba instituisaun tutela hanesan Timor Gás no Petróleu, Empreza Públika (Timor GAP, E.P) no Autoridade Nasionál Petróleu no Minerál ho totál orsamentu hamutuk $71.300.001.
“Ami seidauk halo trasnferénsia tanba prosesu tenke liuhosi kámara konta, entaun ami seidauk halo ezekuasaun ba trimestre dahuluk nian,” nia dehan.
Jornalista : Arminda Fonseca
Editora : Julia Chatarina
