EKONOMIA, HEADLINE

Empreza lima sai manán-na’in ba lisensiamentu petrolíferu bloku 18

Empreza lima sai manán-na’in ba lisensiamentu petrolíferu bloku 18

ANPM fó rezultadu konkursu públiku lisensiamentu petrolíferu segunda ronde períodu 2019/2022 ba bloku 18, iha Suai Room, Timor Plaza, sesta (22/04). Imajen Tatoli/Francisco Sony

DILI, 22 abril 2022 (TATOLI)—Autoridade Nasionál Petróleu no Minerál (ANPM), sesta ne’e, fó sai rezultadu konkursu públiku lisensiamentu petrolíferu segunda ronde períodu 2019/2022 ba bloku 18 kompostu hosi tasi-laran 11 no rai-maran hitu, ne’ebé hatudu empreza lima sai manán-na’in.

Empreza lima kompostu hosi empreza nasionál rua no internasionál tolu, hanesan iha bloku rai-maran iha Timor Gás no Petróleu, Empreza Públika (Timor GAP, E.P) ba bloku A, ETO, Lda ba bloku B, HTS Exploration ba bloku F, enkuantu iha tasi-laran iha Eni Austrália B.V ba bloku P, no Santos ba bloku R.

Prezidente ANPM, Florentino Soares Ferreira. Imajen Tatoli/Francisco Sony

“Empreza sira ne’e sei asina kontratu iha juñu tinan ne’e no sei implementa projetu. Ita sei iha konferénsia simeira enerjia mina iha loron 14 to’o 16 juñu, entaun ita sei asina kontratu partilla produsaun ka Production Sharing Contracts (PSC),” Prezidente ANPM, Florentino Soares Ferreira, informa ba Agência Tatoli, iha Suai Room, Timor Plaza.

Maski iha lisensiamentu petrolíferu ba bloku 18, maibé foin bloku lima maka atu dezenvolve, enkuantu seluk seidauk.

“Maneira ne’ebé ANPM sei halo ba oin mak promosaun no halo ajudikasaun diteita. Ita bele fó ba empreza ne’ebé interese, ita bolu sira hodi halo negosiasaun, ida-ne’e sei loke oportunidade, maski foin empreza lima mak hetan maibé ne’e sorti di’ak ba Timor-Leste tanba iha situasaun difísil hanesan COVID-19 maibé bele lori investidór mai, kompara ho nasaun seluk,” nia akresenta.

Notísia relevante: ANPM publika dokumentu empreza hitu konkore lisensiamentu petrolíferu bloku 18

Governu liuhosi ANPM hakarak realiza simeira hodi muda perspetiva ema hotu, liuliu timor-oan kona-ba indústria petrolífera.

“Ita-nia objetivu fundamentál mak fó oportunidade ba timor-oan hasoru empreza internasionál iha indústria petrolífera, minerál no gás,” Florentino Soares hato’o.

ANPM fó rezultadu konkursu públiku lisensiamentu petrolíferu segunda ronde períodu 2019/2022 ba bloku 18, iha Suai Room, Timor Plaza, sesta (22/04). Imajen Tatoli/Francisco Sony

Bainhira asina ona kontratu, empreza sira hahú serbisu iha área identifikadu tanba hafoin akordu vigór ona, loron efetividade implementasaun kontratu partilla produsaun mós hahú daudaun.

Aleinde ne’e, empreza internasionál ne’ebé sai manán-na’in ba bloku sira, ba oin sei estabelese sede iha Timor-Leste nune’e bele kontrata timor-oan ba serbisu.

“Ita iha esperiénsia iha rai-maran, Timor Resources emprega timor-oan kuaze ema 1.000 hodi hetan oportunidade partisipa iha sísmiku. Entaun bele loke oportunidade durante prosesu sízmiku bele kontrata no emprega timor-oan,” nia tenik.

Tuir estimasaun, bainhira empreza lima asina ona kontratu serbisu, iha inísiu iha rai-maran sei hahú halo peskiza no bainhira halo sízmiku bele kontrata timor-oan halo serbisu.

Mapa bloku 18. Imajen/ANPM

“Ida-ne’e depende ba bloku, karik hetan difikuldade iha terrenu, númeru ne’e bele aumenta, maibé foufoun empreza lima sei fó serbisu ba ema entre 500 to’o 1.000 ba períodikamente la’os kontrata tinan barak. Bainhira sira halo ona sízmiku no perfurasaun mak bele fó serbisu ba ema bele to’o 200, maibé iha tasi-laran ne’e númeru sei liu ida-ne’e,” nia informa.

To’o etapa ne’e, Prezidente ANPM konsidera hanesan momentu importante ba Timor-Leste tanba fó oportunidade di’ak atubele haree tan rikusoin mina no gás ne’ebé iha tanba kampu petrolíferu Bayu-undan besik maran ona.

Notísia relevante: Projetu CCS sai alternativa bainhira mina iha kampu Bayu-undan maran

Iha loron 03 outubru 2019, Primeiru-Ministru, Taur Matan Ruak, lansa konkursu públiku ba mina no gás hamutuk bloku 18.

Tuir planu antes ne’e, lisensiamentu konkursu públiku segunda ronda sei termina iha loron 01 outubru 2021, maibé ANPM deside hodi mantein hodi la’o tuir lala’ok indústria petrolífera, nune’e extende konkursu no fó oportunidade no tempu ba empreza internasionál no nasionál prepara dokumentu no submisaun ba konkursu ne’e.

Durante tinan 2020 no 2021, ANPM hamosu estratejia foun hodi halo promosaun ba lisensiamentu ne’e, liuhosi organiza konferénsia balun hanesan Simeira Energia Timor-Leste ba daruak iha tinan 2020 no Simeira Enerjia Timor-Leste ba datoluk iha tinan 2021 liuhosi virtuál inklui fórum ne’ebé foka liu ba rekursu Timor Leste.

Antes ne’e, ANPM mós partisipa iha eventu oin-oin hodi halo promosaun ba lisensiamentu segunda ronda, hanesan NAPE no OTC 2021, ADIPEC 2021 no African Oil Week 2021.            

Jornalista : Arminda Fonseca

Editora     : Julia Chatarina

iklan
iklan

Leave a Reply

iklan
error: Content is protected !!