DILI,22 abríl 2022 (TATOLI)—Xefe Departamentu Forensik iha Hospitál Nasionál Guido Valadares (HNGV), Nilton Tilman, informa hahú janeiru too marsu 2022, halo ona autópsia ba mate-isin iha mortuáriu hamutuk 22.
“Ita halo ona autópsia ba mate-isin hamutuk 22, kompostu hosi janeiru iha kazu hamutuk 11, hosi númeru ne’e mane na’in-ualu no feto na’in inklui mate-ruin na’in rua ne’ebé mak ita rekolla iha munisípiu Liquiça, nune’e mate ruin na’in-rua tama iha kategoria seidauk bele define no iha fevereiru too marsu ne’e hamutuk 11,” Xefe Departamentu ne’e hateten ba jornalista sira iha knaar fatin mortuáriu HNGV, sesta ne’e.
Nilton Tilman informa, hosi kazu outópsia ne’e maioria kazu omísidiu ka ema oho, oho aan kazu bebé ema soe ne’ebe mak sei hela prosesu investigasaun nia laran.
“Ita halo autópsia atu intensaun buka motivu mate tanba saida, hafoin estuda no entrega rezultadu ba prosesu legál liuliu iha tribunál atu juís sira foti konkluzaun ba kazu,” nia esplika.
Forensik nia servisu atu fasilita prosesu investigasaun, bainhira hetan mandadu hosi tribunál no PNTL atu halo investigasaun kazu omisídiu sira.
Laiha médiku espesialista
Daudaun ne’e, Departamentu Forensik laiha médiku espesialista, nune’e ita sei depende ba médiku espesialistakubanu sira.
“Signifika ita krize ba médiku espesialista ba ida ne’e tanba durante Forensic servisu hamutuk ho Ministériu Saúde, Ministériu Justisa, Ministériu Interiór, maibé ami buka dalan espesialista la iha agora médiku espesialista Kubanu mak daudaun ne’e jere hodi hala’o autópsia ba mate-isin sira hodi deteta kazu sira ne’e,” nia afirma.
Kona-bá ekipamentu, Xefe Departamentu ne’e mós dehan la sufisiente hodi halo autópsia tanba zeleira malirin atu rai mate-isin mós kondisaun ladun d’iak.
Nune’e, Xefe Departamentu ne’e husu ba Governu liuhosi Ministériu Saúde atu investe iha área ne’e hodi redús dependensia ba médiku espesialista hosi rai liur no haree mós ba fasilidade sira.
Jornalista : Felicidade Ximenes
Editór : Florencio Miranda Ximenes
