iklan

EKONOMIA, HEADLINE

MTKI no UNDP sei implementa projetu YEES iha juñu 2022

MTKI no UNDP sei implementa projetu YEES iha juñu 2022

Vise-Ministru Turizmu Komérsiu no Indústria, Domingos Lopes Antunes. Imajen Tatoli/Francisco Sony

DILI, 22 abril 2022 (TATOLI)—Ministériu Turizmu Komérsiu no Indústria (MTKI) hamutuk ho parseiru Programa Nasaun Unida ba Dezenvolvimentu (UNDP, sigla portugés), sei implementa projetu Youth Employment and Entrepreneurship Skills (YEES), iha juñu 2022.

Vise-Ministru Turizmu Komérsiu no Indústria, Domingos Lopes Antunes, hateten, projetu ne’e mai ho objetivu atu apoiu planu negósiu inovativu no fó kréditu funan kiik ba joven ne’ebé iha planu halo negósiu.

“Programa ne’e liuliu ba joven sira ne’ebé serbisu iha rai-li’ur hanesan Austrália, Koreia Súl, Israel, no Inglatera, bainhira repatria no hakarak halo negósiu ruma, ita fasilita sira-nia ideia negósiu liuhosi projetu ne’e,” Vise-Ministru hateten ba Agência Tatoli iha ninia knaar fatin, Bebora, sesta ne’e.

Notísia relevante: Empreza na’in-23 sai ona benefisiáriu programa kréditu suave hosi MTKI

Inisiativa ne’e hanesan polítika Governu hodi redús númeru dezempregu iha Timor-Leste.

“Daudaun ne’e problema boot ne’ebé hasoru mak númeru dezempregu aumenta, tanba ne’e ita ho parseiru hanoin implementa projetu atu apoiu joven halo negósiu iha setór produtivu hanesan turizmu, indústria, komérsiu, peska no agrikultura, ne’ebé ita presiza dezenvolve nune’e bele kria empregu ba sira-nia an no bainhira planu negósiu di’ak bele emprega ema barak,” nia akresenta.

Governu iha meta ba programa ne’e, bainhira implementa sei benefisia direita ba ema 23.110 no indireita ba ema 1.500.

“Output hosi projetu ne’e mak sei mellora ekonomia família iha ita-nia rai,” membru Governu ne’e tenik.

Projetu YEES finansia hosi Korea International Cooperation Agency (KOICA) ho totál orsamentu milliaun $6 no hosi UNDP hamutuk $480.000, ne’ebé parte MTKI no UNDP rasik mak sei implementa programa.

Jornalista : Arminda Fonseca

Editora      : Julia Chatarina

iklan
iklan

Leave a Reply

iklan
error: Content is protected !!