DILI, 26 abril 2022 (TATOLI)–Ministru Finansa (MF), Rui Augusto Gomes, aprezenta proposta lei iha reuniaun Konsellu Ministru (KM) extraordinária ne’ebé hetan ona aprovasaun, kona-ba alterasaun dahuluk ba lei númeru 1/2022, loron 03 janeiru, Orsamentu Jerál Estadu (OJE) 2022.
“Ho ida-ne’e katak iha orsamentu retifikativu, nune’e bele halo di’ak liután ba lei orsamentu ne’ebé vijente hela. Sei iha aumentu ba orsamentu tinan ne’e,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Auditorium Ministériu Finansa, Aitarak-laran, tersa ne’e
Portavóz Governu dehan, inisiativa ne’e mosu tanba haree ba situasaun ekonómika internasionál no taxa inflasaun substansiál ne’ebé aumenta, tanba ne’e presiza atu aplika medida sira hodi hamenus ninia impaktu ekonómiku no prevee dotasaun orsamentál ne’ebé nesesária hodi finansia medida lubun ida.
Notísia relevante: Prezidente Repúblika promulga lei OJE 2022
Medida sira ne’e mak hanesan atribuisaun osan fulan da-13 ba kada família exetu funsionáriu públiku sira, projetu Uma Kbiit Laek Plus, Bolsa Estudu ba Mellór Graduadu Estudante Ensinu Báziku no Sekundáriu, Kriasaun Fundu Veteranu, programa mão de obra ba Postu Administrativu (PEMOPA), harii Sede Arte Marsiál no Rituál, programa ensinu distánsia (Eskola iha Uma), internet gratis iha eskola sira, empregu ba mellór alunu universitáriu sira.
Nune mós, estabelesimentu Sekretariadu ba Asuntu Traballadór Esteriór no Komunidade Timoroan iha Diáspora, Revitaliza kafé no subsídiu ba kafé Laku-teen, Subsídiu akomodasaun ba Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL), Pagamentu ba diferensa remunerasaun PNTL nian ho rejime salariál foun, ho totál benefisiáriu 4.096.
“Nune’e, finansiamentu ba medida sira ne’e prosede ba reforsu dotasaun títulu Dotasaun Ba Governu Tomak, ho kompensasaun iha aumentu transferénsia Fundu Mina-rai nian,” Ministru subliña.
Antes ne’e, tetu OJE 2022 ne’ebé Governu submete ba Parlamentu Nasionál ho montante biliaun $1,675, kompostu hosi saláriu no vensimentu millaun $233, bens no servisu millaun $449,98, transferénsia públika millaun $565,9, kapitál menór millaun $24,4 no kapitál dezenvolvimentu millaun $401,7.
Maibé liuhosi debate espesialidade iha proposta adisionál hamutuk 165 hosi deputadu sira no hosi proposta hirak ne’e mak iha adisionál millaun $300 resin, nune’e OJE 2022 sa’e ba biliaun $1,967.
Jornalista : Antónia Gusmão
Editora : Julia Chatarina
