DILI, 28 abril 2022 (TATOLI)—Vise-Ministru Obra Públika (MOP), Nicolau Lino Freitas Belo, hateten, Governu ho na’in ba Eskola Sekundária Colégio São Miguel Arcanjo iha área Comoro, iha ona konkordánsia hodi sobu edifísiu nune’e bele aselera konstrusaun estrada ligasaun rotunda Comoro bá Tasi-tolu.
“Foin daudaun iha problema sosiál, katak komunidade afetadu sira lakohi harii edifísiu são Miguel iha ne’ebá. Tanba ne’e maka ami konsege rezolve ona liuhosi konsultasaun públika no tempu badak sei halo kontratu ho são Miguel, tanba esbosu kontratu finaliza ona. Tanba ne’e maka tempu badak iha konkordánsia bele sobu ona,” Vise-Ministru informa hafoin ramata reuniaun ho Primeiru-Ministru (PM), Taur Matan Ruak, iha Palásiu Governu, kinta ne’e.
Notísia relevante: Semana ne’e, kompañia Jonize sei halo reabilitasaun estrada Tasi-tolu
Estrada ligasaun ne’e nu’udar estrada ne’ebé ligasaun entre Dili-Indonézia, nune’e mós Portu Tibar, ne’ebé tempu badak sei finaliza konstrusaun.
Trosu estrada rotunda Nicolau Lobato to’o Tasi-tolu ho distánsia kilómetru 1,2, ne’ebé metru 743 finaliza ona reabilitasaun.
“Edifísiu São Miguel trosu ida sei afeta ba dezenvolvimentu estrada ne’e rasik. Tanba sá mak to’o agora seidauk bele sobu Eskola São Miguel ho razaun presiza iha konkordánsia entre São Miguel ho Governu. Molok atu muda, Governu tenki prepara kondisaun ba sira liuliu rai. Entaun hosi Terra no Propriedade entrega ona rai iha bairru Seroja hodi harii edifísiu foun, entaun ho ida-ne’e Governu sei halo levantamentu dadus,” governante ne’e esplika.
Antes ne’e, Governu prevee kustu indemnizasaun ba komunidade afetadu iha área konstrusaun ho montante milaun $1,6 resin, hahú hosi pagamentu faze dahuluk iha setembru ba afetadu 46 ho valór $679.000, faze daruak iha 29 setembru 2020 ho totál afetadu 65 no totál indemnizasaun $846.000 no pagamentu ba faze datoluk iha novembru 2020 ba abitante 23 ho orsamentu $131.000, nune’e to’o oras ne’e komunidade ne’ebé hetan ona indemnizasaun kuaze hamamuk ona área konstrusaun.
Maski nune’e, Eskola São Miguel mak seidauk hetan indemnizasaun tanba antes ne’e seidauk iha konkordánsia entre parte rua.
Governu fó indemnizasaun tanba estrada Rotunda Comoro to’o Tasi-tolu ho distánsia kilómentru rua hamutuk ho pakote estrada trosu Tibar to’o Tasi-tolu, ne’ebé toma konta hosi empreza internasionál China Wuyi ho kustu millaun $12-resin, hahú iha loron 28 fevereiru 2019 to’o ramata.
Maibé, iha ámbitu preparasaun restaurasaun independénsia Repúblika Demokrátika Timor-Leste ba da-XX no pose ba Prezidente Repúblika eleitu períodu 2022-2027, José Ramos Horta, Governu deside ona atu reabilita estrada Tasi-tolu ho karakter urjénsia, ne’ebé daudaun iha prosesu reabilitasaun hosi empreza nasionál Jonize.
Jornalista : Antónia Gusmão
Editora : Julia Chatarina
