BOBONARO, DEFEZA, HEADLINE, MUNISÍPIU, NASIONÁL, POLÍTIKA, SEGURANSA

PM Taur hatuur fatuk dahuluk ba projetu postu integradu UPF

PM Taur hatuur fatuk dahuluk ba projetu postu integradu UPF

Primeiru-Ministru, Taur Matan Ruak, domingu nee hatuur dahuluk ba postu integradu PNTL-UPF, iha suku Batugade, postu administrativu Balibo, munisípiu Bobonaro. Imajen TATOLI/Antónia Gusmão.

DILI, 29 maiu 2022 (TATOLI)– Primeiru-Ministru (PM), Taur Matan Ruak hamutuk ho Embaixadór Austrália iha Timor-Leste, William Terrence Costelo, domingu ne’e hatuur fatuk dahuluk hodi halo lansamentu ba postu integradu Polísia Nasionál Timor-Leste (PNTL), Unidade Patrullamentu Fronteira (UPF), iha Mota-ain, suku Batugade, postu administrativu Balibo, munisípiu Bobonaro.

“Ita iha tinan 20 ita halo postu UPF hamutuk 25, iha tinan rua ita halo 25, ida-ne’e konsege tanba ita iha parseria di’ak ho Governu Austrália liuhosi embaixada nomós ita-nia parseiru TLDP, iha balun ita-nia parseiru mesak mak halo, iha balun ita mak halo maibé kuaze projetu sira-ne’e hotu ita iha parseria tanba buat ne’ebé ita labele kompleta, sira kompleta hanesan ekipamentu iha laran Governu la tau osan, maibé enkuadra iha programa rua formasaun no treinu no bens estar ba ita-nia polísia sira tanba ita la’ós de’it ejize atu sira presta servisu ida di’ak ba komunidade no ba nasaun más liuliu sira-nia fatin mós ita tenke hadi’a,” Taur hateten iha ámbitu lansamentu konstrusaun postu integradu UPF, iha Batugade.

Notísia relevante : http://www.tatoli.tl/2021/09/30/pm-espera-aumenta-postu-iha-fronteira-bele-reduz-pasajen-ilegal/

Taur akresenta, Postu integradu halo neen iha Timor laran tomak, iha Oe-cusse no fronteira sira, tinan ne’e la’ós halo de’it postu integradu neen maibé halo mós postu Polísia Fatuhada.

Xefe Governu parabeniza kontratór ne’ebé sei ezekuta obra refere no husu atu garante kualidade.

“Ha’u hakarak imi (empreza) halo kualidade di’ak. Ha’u la ejize liu buat ne’ebé iha rekezitu ne’ebé ejize iha dezeñu maibé ha’u ejize halo hanesan. Governu nia preokupasaun boot mak oinsá garante kualidade projetu sira. Bainhira di’ak la’ós de’it governu no hirak-ne’ebé uza mak kontenti maibé kontratór sira mós hetan previleizu tanba dala barak hateten buat ne’ebé Timoroan mak kaer ne’e ladi’ak tanba barak hanoin mak lukru maibé alende lukru kualidade projetu ne’e importante loos”, Xefe Governu ejize.

Governu nafatin atu servisu ho parseiru dezenvolvimentu sira no governu Austrália nune’e neineik hadi’a kondisaun servisu fatin no hela fatin ba polísia sira iha fronteira no postu sira.

Komandante Jerál PNTL, Komisáriu Faustino da Costa, hateten serimónia ne’e simples maibé signifikante tebes la’ós ba PNTL maibé mós ba Timor-Leste liuliu oinsá atu asegura Timor-Leste iha rai-ketan.

“Ami hakarak agradese ba Primeiru-Ministru ne’ebé konstrui ona postu sira iha fronteira, ne’ebé mai hosi orsamentu Estadu nian maibé mós ho esforsu Xefe Governu nian hodi ikus mai hetan parseiru dezenvolvimentu ne’ebé appoiu, la’ós de’it iha momentu ida maibé iha tempu ida ne’ebé defisil hanesan COVID-19 nian,” Faustino subliña.

Lideransa másima instituisaun seguransa ne’e afirma, PNTL hanesan instituisaun Estadu ne’ebé iha nia finalidade hodi defende demokrasia legál no garante seguransa ida ba ema hotu no riku-soin ema hotu nian, proteje sidadaun sira-nia direitu.

“Inaugurasaun ba postu sira-ne’e iha ninia efeitu no importánsia ba iha implementasaun hodi garante katak la’ós de’it Timor-Leste mak seguru maibé mós membru sira-ne’ebé hala’o sira-nia knaar no responsabilidade bele iha kondisaun ida,” nia enkoraja.

Biban ne’e, Xefe Ezekutivu ne’e akompaña hosi Vise Ministru Interiór, António Armindo no Embaixadór Austrália iha Timor-Leste, William Terrence Costelo, inaugura postu UPF rua ne’ebé apoia hosi Governu Austrália.

Postu UPF rua ne’e ida lokaliza iha Balibo ho naran Postu Fronteira PNTL-UPF sukaer Midar-Kowa, no seluk mak Postu Fronteira TCL 13-Mota’Ain, Batugade. Postu refere kompleta ho fasilidade sira hanesan toba-fatin ba membru sira no sanitasaun.

Postu integradu ne’e sei konstrui hosi kompañia Leo Hara Unip, Lda, ho totál orsamentu $315,211.39 (verba ne’e hosi Orsamentu Jerál Estadu), ho durasaun tempu fulan neen (6).

Partisipa iha atividade ne’e Ministru Defeza (MD), Filomeno da Paixão de Jesus, Komandante PNTL, parseiru dezenvolvimentu, Komandante UPF no membru sira, reprezentante Autoridade Aduaneira/Alfándega, Servisu Migrasaun, Autoridade komunitária Balibo no komunidade.

Jornalista : Antónia Gusmão

Editor: Evaristo Soares Martins

iklan
iklan

Leave a Reply

iklan
error: Content is protected !!