COVALIMA, 31 maiu 2022 (TATOLI)–Diretór Servisu Munisipál Protesaun Sivil, Jestaun Dezastre Naturál Covalima, Quintino da Costa informa, hahú janeiru to’o maiu ne’e Servisu Munisipál Protesaun Sivil Jestaun Dezastre Naturál Covalima rejista uma-kain 42 iha Covalima sai vítima ba dezastre naturál.
Notísia Relevante: Janeiru-marsu, Covalima rejista vitima dezastre naturál 38
“Ha’u hakarak informa, hahú iha fulan-janeiru to’o maiu 2022 ne’e, Servisu Munisipál Protesaun Sivil Jestaun Dezastre Naturál Covalima, rejista uma-kain 42 sai vítima ba dezastre naturál iha Covalima,” Quintino da Costa informa ba Agência Tatoli, iha resintu AMC, Kampung Baru, tersa ne’e.
Vítima dezastre naturál uma-kain 42 ne’e, anin boot ahi-han uma no anin sobu sira-nia uma ho kondisaun aat kman no aat totál maibé parte Governu fó ona apoiu ai-han no la’os ai-han ba sira.
“Kona-ba apoiu materiál atu halo rekuperasaun ba uma, ida-ne’e kompeténsia hosi Dirasaun Nasional mak halo prosesu,” nia informa.
Uma-kain sira-ne’ebé sai vítima ba dezastre naturál ne’e iha postu administrativu Zumalai rejista vítima uma-kain 12, Fohorem uma-kain ualu (8), Maucatar uma-kain haat (4), Fatululik uma-kain tolu (3), Tilomar uma-kain haat (4) no Suai Vila ne’e iha vítima uma-kain 10.
Jornalista : Celestina Teles
Editór : Cancio Ximenes
