DILI, 16 juñu 2022 (TATOLI)—Autoridade Nasionál Petróleu no Minerál (ANPM) iha ona planu tinan ne’e sei loke konkursu públiku ba setór minerál.
“Planu tinan ida-ne’e ita sei loke konkursu hahú hosi agostu to’o dezembru 2022, tanba durante iha simeira ne’e iha empreza neen to’o sanulu iha ona interese mai investe iha área minerál, nune’e ita espera atribuisaun direitu mineiru bele akontese iha tinan ida-ne’e nia-laran, tarde liu dezembru,” Vise Prezidente ANPM ba Asuntu Esplorasaun no Exportasaun Minerál, José Gonçalves, hateten, iha City 8, Manleuana, kinta ne’e.
Notísia relevante: ANPM realiza simeira internasionál IV enerjia no minerál
Nune’e, hafoin konkursu, ekipa responsável bele halo ona kualifikasaun ba sira ne’ebé prienxe ona rekezitu atu investe iha setór minerál.
ANPM sei realiza konkursu públiku tanba Timor-Leste nia kódigu mineiru legalmente aplika ona, tanba ne’e esforsu balun ne’ebé autoridade halo iha setór rekursu minarál mak finaliza bloku balun ne’ebé bele loke ba investimentu no oferese ba indikasaun ein termu timeline preliminar ba indústria.
Tanba ne’e, objetivu realiza simeira atu empreza sira ne’ebé envolve iha setór minerál atu entende katak durante tinan ne’e nia-laran sei hakat ba prosesu loke oportunidade ba área sira ne’ebé indika ona, nune’e bele hahú investimentu no ho peskiza iha setór minarál.
“Espera katak empreza sira sei iha atentasaun ka responde di’ak tanba durante aprezentasaun iha simeira, ita nota iha empreza lubuk ida no hafoin aprezentasaun ita halo komunikasaun di’ak ba empreza lokál no internasionál sira ne’ebé espresa ona interese atu investe iha setór minerál nian,” nia akresenta.
ANPM sei hakbesik ba empreza sira ne’ebé iha ona interese atu fahe informasaun kona-ba potensialidade ba rekursu minerál ne’ebé iha, hodi nune’e sira bele define atu investe iha parte ne’ebé no modalidade oinsá.
“Ita-nia item minerál ne’ebé empreza sira interese mak ita-nia potensiál ne’ebé agora ita rejistu hanesan mineru pezadu ne’ebé ita bolu metáliku, ne’e barak liu mak halai ba tembaga, osan-mean, mutin, kromiun, no manganeza, ida-ne’e ita tenta atu sai rekursu ne’ebé hakarak sira investe ba maibé la taka dalan tanba iha indikasaun lubuk ida ne’ebé hatudu ezisténsia minerál sira seluk ho valór boot hanesan terras rara,” nia informa.
Serbisu boot ne’ebé ANPM sei halo mak asegura aprovasaun hosi Konsellu Ministru ba zona no bloku rekursu minerál sira ne’ebé bele loke hanesan saida mak petróleu halo ona, nune’e bele aplika.
“Ita-nia kódigu mineiru ne’e hatuur ona rekezitu sira atu hahú prosedimentu administrativu sira atu hahú konkursu, rekezitu ne’e lei iha ona maibé detallu ita presiza tan dekretu-lei ka regulamentu balun ne’ebé sei hatuur padraun ruma ba tipu atividade espesiál ruma. Ezemplu perfurasaun ba atividade meneiru ne’ebé presiza utiliza rekezitu rigorozu oituan,” nia tenik.
Kona-ba prosesu estabelese regulamentu ne’e, ANPM hahú tiha ona desde inísiu tinan ida-ne’e no agora esforsu regulamentu iha ona prosesu revee atu kompleta liután.
“Tuir planu tinan ne’e nia-laran ita-nia regulamentu setór minerál nian irárkia, katak iha lei nia okos sei vigór nune’e bele fasilita atividade sira, maibé hosi auzensia ita-nia regulamentu ne’e ita bele hahú uluk ona prosesu balun ne’ebé bele fasilita loke dalan ba investimentu setór minerál,” Vise Prezidente reforsa.
Iha biban hanesan, Prezidente ANPM, Florentino Soares Ferreira, hateten, atividade simeira durante loron-tolu ko’alia kona-ba asuntu tolu hanesan atividade petróleu, konteúdu lokál ba partisipasaun emprezáriu lokál iha atividade petroléu no atividade minerál.
“Rezultadu simeira ne’e pozitivu tebes tanba ita iha partisipasaun maka’as tebes hosi rai-li’ur no ita konsege asegura diskusaun prinsipál lubuk ida mai hosi setór enerjétika no projetu mina no gas nian, ho ida-ne’e ita iha investidór lubuk ida mak hakarak mai halo investimentu,” nia dehan.
ANPM ko’alia kestaun lubuk ida hanesan prepara Timor-Leste bele hadi’a liután konteúdu lokál ba mina, gás no mimeiru nian.
Jornalista : Arminda Fonseca
Editora : Julia Chatarina
