DILI, 20 juñu 2022 (TATOLI)—Diretór Nasionál Asisténsia Sosiál (DNSA), Lucas Tois, informa benefisiáriu Bolsa da mãe atuál iha territóriu nasionál hamutuk rihun 101 ne’ebé mak simu subsídiu hosi Governu.
Notísia Relevante: MSSI hahú verifika dadus benefisiáriu bolsa da mãe ba labarik atuál
“Dadus hosi Ministériu Solidariedade Sosiál no Inkluzaun (MSSI), to’o 2021 ne’e, benefisiáriu bolsa da mãe iha territóriu Timor-Leste hamutuk 101.000-resin ne’ebé nafatin simu subsídiu Governu to’o ohin loron,” Lucas Tois informa ba Agência TATOLI, iha nia knaar fatin Caicoli, Dili, segunda ne’e.
Subsídiu bolsa da mãe atuál ne’ebé hahú implementa iha 2012 ne’e atu sustenta família vulneravél ho kada benefisiáriu fulan ida simu $5 no tinan ida $60.
Maibé, nia dehan, família ida labarik liu ema na’in-tolu mak rejista entaun MSSI liuhosi diresaun DNSA sei fó de’it ba ema na’in-tolu ho totál tinan ida $180.
Maibé, tuir Diretór Administrasaun Finansa, Rui Manuel Gago Exposto, hateten bolsa da mãe atuál ne’e bainhira implementa mak iha impaktu boot entaun automatikamente sei esklui mesak tanba bainhira implementa mak laiha impaktu hosi programa ne’e.
Programa bolsa da mãe ne’e atu haree ba iha ema-ne’ebé konsidera vulneravél ekonómika no sosiál hodi fó subsídiu no hahú implementa iha 2008 ho programa pilotu iha munisípiu balun de’it, maibé iha 2012 mak ba munisipiu no postu administrativu hotu-hotu to’o agora.
Tuir Dekretu-Lei 14/04/2012, ho objetivu atu promove labarik hosi tinan 0-17 liu-liu atu asesu ba eskola mínimu frekuente to’o eskola sekundáriu no asesu saúde.
Jornalista : Osória Marques
Editór : Cancio Ximenes
