EDUKASAUN, HEADLINE

ADN ko’a fundu 8% hosi orsamentu projetu komunitária

ADN ko’a fundu 8% hosi orsamentu projetu komunitária

Diretór Ensinu Báziku (EBC) 30 agostu, Comoro, Dili, Filomeno Salsinha. Imajen Tatoli/Felicidade Ximenes

DILI, 23 juñu 2022 (TATOLI)—Ajénsia Dezenvolvimentu Nasionál (ADN) ko’a ona orsamentu ba programa projetu komunitária ne’ebé halo reabilitasaun ba Eskola Ensinu Báziku Sentrál (EBC, sigla portugés) 30 Agostu, Comoro, hamutuk 8% hosi totál alokasaun $31.000.

Diretór Eskola EBC 30 Agostu, Filomeno Salsinha, hateten, daudaun ne’e Governu hasoru difikuladade ho orsamentu, tanba ne’e maka prosesu reabilitasaun ne’e paradu. Prosesu reabilitasaun ba segunda faze paradu kedan hosi Eleisaun Prezidensiál primeira ronda to’o agora. Maibé parte eskola kontinua ezije ba Ministériu Edukasaun Juventude no Desportu (MEJD) maka foin lalais ne’e orsamentu reabilitasaun segunda faze ba eskola ne’e konsege iha alokasaun.

“Ha’u sisi sira maka’as maka horiseik ita-nia osan reabilitasaun ba segunda faze ne’e sira konsege transfere ona, maibé la hatene eskola seluk iha Dili laran ne’e simu hotu ona ka seidauk, ha’u la hatene,” Diretór informa ba Agência Tatoli, iha Comoro, kinta ne’e.

Notísia relevante: Eskola 197 asina ona kontratu projetu komunitáriu hadi’a eskola

Prosesu reabilitasaun eskola ne’e rasik hosi faze primeiru konsege atinje ona 30%, maibé atu kontinua tan ba faze daruak ne’e maka paradu kuaze fulan-tolu kedan.

“Tuir planu Governu nian, prosesu reabilitasaun ne’e tenke finaliza iha fulan-neen maibé agora la tuir ona oráriu tamba atu tama ona jullu,” nia akresenta.

Iha fatin ketak, Koodenadora Eskola Ensinu Báziku Filiál (EBF) Duque de Caxias Bemori, Eliza Martins relata katak sira-nia prosesu reabilitasaun paradu totál no to’o agora foin maka atinje 15% de’it.

“Iha edifísiu ida no sala aula tolu foin maka tau besi seidauk taka kalen maibé paradu to’o agora tanba osan laiha. Ami seidauk hetan informasaun bainhira maka bele kontinua fali prosesu reabilitasaun ne’e, tanba hosi sentrál mak hatene ne’ebé ami iha filiál ne’e hein de’it,” nia tenik.

Jornalista  : Tomé Amado

Editora      : Julia Chatarina

iklan
iklan

Leave a Reply

iklan
error: Content is protected !!