COVALIMA, 23 juñu 2022 (TATOLI)—Ekipa konjunta hosi Servisu Munisipal Seguransa Alimentar (SMSA), Servisu Saúde Ambiente, Servisu Agua Saneamentu no Ambiente (SAS) no Bee Timor Leste Empreza Públiku (BTL, E.P) hamoos bee posu iha Aldeia Fatisin, suku Camanasa, munisípiu Covalima.
Diretór Servisu Munisipál Seguransa Alimentar (SMSA), Reinaldo da Cruz Coli hateten, komunidade konsumu ai-han ne’ebé seguru no nutritivu tenke konsumu bee-moos atu labele afeta ba komunidade nia saúde.
“Ita ko’alia kona-ba ai-han seguru ita konsumu ai-han nutritivu ita tenke asegura mos bee hodi kontrola nia kualidade, tanba bainhira ita konsumu ai-han nutrivu tenke iha bee ne’ebé mak iha kualidade atu labele afeta ba komunidade sira-nia saúde,” Diretór Servisu Munisipál Seguransa Alimentar (SMSA), Reinaldo da Cruz Coli, informa ba Agência Tatoli, iha aldeia Fatisin, kinta ne’e.
Hafoin hamoos bee-posu ne’e ekipa sira husu ba komunidade atu labele soe lixu arbiru maibé tenke tau lixu iha nia fatin no uza bee ho kuidadu.
Asisténsia Saúde Ambientál Covalima, Deonisio Freitas Barreto hateten, durante ne’e komunidade konsumu bee foer ho nune’e fó impaktu ba komunidade nia saúde hanesan moras vias respiratóriu, iritasaun ba kulit no moras diarea.
“Ami-mai halo asaun hodi hamoos bee-posu ba komunidade hodi tau kaporit ho nia funsaun atu hamate bakteria iha bee-posu, nune’e komunidade bele konsumu bee-moos ho saudavél,’ nia dehan.
Hafoin Servisu Saúde Ambiental Covalima tau kaporit ba bee-posu, nia husu komunidade labele konsumu lai bee-posu refere durante oras 24 nia laran, maibé se di’akliu durante loron tolu nune’e isterílizasaun bee di’ak tiha mak hafoin bele konsumu.
Saúde Ambiente Covalima mós hatoo mensajen ba komunidade sira uza bee ho kuidadu no tenke tau lixu iha nia fatin, nune’e bele garante ambiente ne’ebé saudavél ba komunidade sira.
Reprezentante Komunidade Fatisin, Quintão Alves, sente kontente bainhira ekipa konjunta sira hamoos bee-posu ne’e tanba durante ne’e sira konsumu de’it bee-foer hodi fó impaktu ba sira-nia família nia saúde.
“Ami sente kontente bainhira ekipa konjunta hamoos bee-posu iha ne’e, nune’e bele konsumu bee ne’ebé moos,” nia dehan.
Tuir ajenda hosi ekipa refere, hafoin hamoos bee-posu iha aldeia Fatisin, suku Camanasa ne’e, ekipa konjunta ne’e sei kontinua hamoos bee-matan parte iha suku Debos nian.
Jornalista : Celestina Teles
Editór : Cancio Ximenes
