COVALIMA, 24 juñu 2022 (TATOLI)–Servisu Munisipál Jestaun Dezastre Naturál (SMDN) munisípiu Covalima identifika planu halo mapeamentu fatin risku ba dezastre naturál no halo konservasaun ambientál iha munisípiu Covalima.
Diretór Servisu Munisipál Protesaun Sivíl no Jestaun Dezastre Naturál munisípiu Covalima, Quintino da Costa, hateten planu rua ne’e servisu Munisipál Jestaun Dezastre Naturál munisípiu Covalima hamutuk ho servisu delegasaun sira deside sei implementa iha trimestre datoluk.
“Bazea rezultadu enkontru Servisu Munisipál Protesaun Sivíl no Jestaun Dezastre Naturál ohin, ami identifika planu no sei define mapementu ba akontesumento dezastre naturál iha Covalima, ne’ebé servisu munisipal hamutuk ho servisu delegasaun teritoriál sei halo planu no halo kordenasaun ho servisu floresta hodi halo koordenasaun ba konservasaun ambientál liu-liu ba fatin sira-ne’ebé mak rai halai,” Quintino da Costa hateten ba jornalista sira, iha salaun sentru solidariedade sosiál, Suai Loro, sesta ne’e.
Nkontru ne’e realiza relasiona ho previzaun tempu ne’ebé halo predisaun katak iha fulan-janeiru to’o fulan-juñu tinan ne’e, akontese fenomena mosu Laniña ka udan boot nune’e konvoka reuniaun preparasaun hodi sukat rekursu umanu hosi entidade ne’ebé servisu iha área dezastre no haree fatin alternativa.
Udan-been makaas akontese Laniña iha rai tetuk bee sa’e no iha foho sira rai monu ne’ebé rezultadu fó impaktu ba komunidade sira hela fatin no plantasaun
“Ho nune’e iha fulan-fevreiru liubá ami halo ona diseminasaun informasaun kona-ba previzaun Laniña iha área sira-ne’ebé mak iha rai-tetuk akontese Laniña, ami fó sai avizu antesipada atu nune’e komunidade atensaun hodi hadook an hosi fatin risku sira,” nia hateten.
Jornalista : Celestina Teles
Editór : Cancio Ximenes
