EKONOMIA, HEADLINE

SETP identifika ona fatin estabelese laboratóriu IQTL, I.P

SETP identifika ona fatin estabelese laboratóriu IQTL, I.P

Prezidente Institutu Kualidade Timor-Leste (IQTL,I.P- Sigla Portugés), Rosito de Sousa Monteiro. Imajen Tatoli/Francisco Sony

DILI, 24 juñu 2022 (TATOLI)–Sekretaria Estadu Terra no Propriedade (SETP) liuhosi Diresaun Jerál Terra no Propriedade, identifika ona fatin hodi estabelese laboratóriu Institutu Kualidade Timor-Leste, Institutu Públiku (IQTL, I.P).

“Ami konfirma ona ho SETP katak tempu badak sira sei atribui fatin ida ne’ebé halo ona identifikasaun, fatin iha ona atu halo manutensaun oituan hodi bele hahú instala laboratóriu ba item produtu balun, tanba hanesan esperiénsia iha fulan ne’e nia laran empreza balun haruka sira-nia produtu, liuliu kafé bá Turkia sira hetan problema bainhira produtu to’o iha fatin ne’e,” Prezidente IQTL, I.P, Rosito de Sousa Monteiro, hateten ba Agência Tatoli iha ninia knaar fatin, Timor Plaza, sesta ne’e.

Notísia relevante: Tinan ne’e, IQTL-UNIDO inisia planu estabelese laboratóriu nasionál kualidade produtu

Tuir nia, loloos ho orsamentu tinan 2021 atu harii ona laboratóriu nasionál ida maibé tanba de’it ho limitasaun orsamentu, nune’e IQTL no United Nations Industrial Development Organization (UNIDO) seidauk deside, maibé ikus mai institutu komunika ho SETP no iha fatin.

“Hosi kontaktu sira ne’e maka tempu badak sira sei atribui fatin mai ami, la presiza laboratóriu boot liu maibé pelu menus halo uluk ba produtu kafé, etapa ba etapa mak halo ba produtu hotu. Tinan ne’e IQTL halo ona aprosimasaun ho Indonézia liuliu Badan Pengawas Obatan Makanan (BPOM), ne’ebé tempu badak apoia ona ekipamentu laboratóriu ba IQTL,” nia akresenta.

Kustu ba estabelesimentu laboratóriu ne’e mai hosi Orsamentu Jerál Estadu (OJE) 2022 hamutuk millaun $1.

Entretantu, IQTL seidauk rekomenda produtu ruma ba rai-li’ur maibé institutu halo parseria ho Indonézia, liuhosi Badan Pengawas Obatan Makanan (BPOM) no Badan Estandarisasi Indonesia, bainhira produtu hosi setór privadu sira ne’ebé atu lori ba rai-li’ur, presiza halo analiza, entaun institutu buka koordena ho parseiru sira hodi halo analiza no fó rezultadu mai institutu, hafoin atribui sertifikadu ba setór privadu sira hodi garante katak sira-nia produtu ne’e kualidade no bele halo exportasaun.

“Hanesan institutu Estadu ne’ebé mak atu garante parseiru hotu ninia atividade ka exportasaun ne’ebé ho kualidade, ami prontu simu pedidu hodi haruka ba halo analiza iha laboratóriu. Iha empreza rua mai husu oinsá mak bele halo analiza produtu, hanesan masin no kafé, nune’e ami rekolla amostra masin no husu ba BPOM hodi halo analiza no rezultadu,” nia tenik. 

Jornalista  : Antónia Gusmão

Editora      : Julia Chatarina

iklan
iklan

Leave a Reply

iklan
error: Content is protected !!