iklan

NASIONÁL, POLÍTIKA

Governu husu komunidade soe lixu tuir oráriu

Governu husu komunidade soe lixu tuir oráriu

Ekipa saneamentu raut hela lixu iha área Kampun Baru, Comoro, Dili. Imajen Tatoli/António Daciparu.

DILI, 28 juñu 2022 (TATOLI)—Xefe Departamentu Saneamentu Munisípiu Dili, Domingos Soriano, husu komunidade atu soe lixu tuir oráriu ne’ebé tau ona iha dekretu lei 33/2008.

Oráriu soe lixu ne’e sei hahú hosi tuku 04h30 madrugada to’o 07h00 dadeersan, nune’e bele fasilita empreza sira foti lixu hodi bele so’e iha lixeira Tibar.

Notísia Relevante: AMD sei fó koima ba infratór sira-ne’ebé soe lixu arbiru

“Bazea ba dekretu lei 33/2008, iha ne’ebá ami mós uza formula ida katak liuhosi sirkulár ne’ebé ami fó sai ba ema hotu iha tinan kotuk katak oráriu soe lixu hahú iha tuku 04h30 madrugada to’o 07h00 dadeersan. Hosi tuku 07h00 dadeer to’o fali tuku 07h00 kalan, ida-ne’e servisu ami-nian. Ida-ne’e ami foti de’it foer no komunidade sei labele soe tan foer iha tempu ne’ebá,” Domingos Soriano hateten ba Agência Tatoli, iha nia knar fatin, Dili, segunda ne’e.

Maibé, nia dehan, realidade to’o agora komunidade la kumpre oráriu soe lixu ne’e tanba fo’er soe hanesan bee mota sulin la para. Entaun Nai-ulun sira haree katak ekipa saneamentu hosi munisípiu Dili la servisu maibé ekipa esforsu an atu hamoos sidade Dili sai sidade moos no saudavél.

‘Ida-ne’e depende ba komunidade nia konsiénsia. Governu la’ós la halo nia servisu maibé komunidade nia konsiénsia mak laiha liu,” nia hateten.

Iha sensibilizasaun ne’ebé autoriadade Munisípiu Dili hala’o iha kada suku no aldeia iha Dili, atu komunidade soe lixu tuir oráriu ne’ebé Governu termina ona maibé realidade komunida seidauk kumpre to’o ohin loron.

Nia informa, empreza nia oráriu foti lixu tuir kontratu ne’ebé halo ho Autoridade Munisípiu Dili (AMD) ne’e haktuir katak sira tenke raut lixu hahú hosi segunda to’o domingu.

“Hosi segunda to’o sábadu loron ida sira raut karada tolu ba kamioneta ida. Só loron domingu de’it mak raut karada rua ba kamioneta ida. Pelumenus sira deskansa uitoan, lorokraik sira hodi ba misa. Tanba ida-ne’e tuir kontratu ne’ebé ami estabelese,” nia dehan.

Tuir nia, komunidade preokupa katak sidade nakonu ho lixu, ida-ne’e Munisípiu Dili bele dehan fila-fali ba komunidade katak tanba lixu ne’e mai hosi komunidade la’ós mai hosi Governu. 

Se lixu mai hosi Governu mak komunidade kritika katak Díli nakonu ho lixu, ida-ne’e loos maibé komunidade mak soe lixu laiha konsiénsia, entaun ida-ne’e fila-fali ba komunidade nia konsiénsia.

“Ho atitude ida-ne’ebé mak ladun di’ak ba ita-nia komunidade, tanba saida ita-nia sidade nakonu ho lixu. Tanba komunidade han soe, hemu soe no fuma soe ba fatin arbiru de’it, tantu iha uma- dalan no jardin sira. Liu-liu mós ba ita-nia estudante sira bainhira halo sira-nia trabllu iha jardin, sira han soe hela iha ne’ebá, ida-ne’e preukupasaun boot liu. Tanba buat hotu Díli hakarak moos, ida-ne’e tenke husu komunidade tenke tau konsiénsia ne’ebé aas, atu nune’e Díli moos hosi lixu. Se ho konsiénsia ne’ebé laiha, hotu-hotu bele ko’alia sidade Dili nakonu ho lixu hela de’it,” nia dehan.

Iha dekretu-lei Númeru33/2008 hateten, sé mak soe lixu arbiru tenke hetan sansaun maibé to’o agora lei seidauk implementa.

“Ha’u la hatene to’o agora ami ne’ebé servisu iha baze la hatene lei ne’e seidauk implementa. Tanba iha lei ne’e, iha parte sorin implementa ona kona-ba kasa animál sira, hanesan ema ne’ebé husik animál livre, ida ne’e la’o ona. Maibé ba ema soe lixu arbiru ka fó sansaun, ida-ne’e mak seidauk. Tanba ne’e, ba futuru tenke aplika dekretu-lei Númeru 33/2008, nune’e komunidade bele iha konsiénsia soe lixu iha nia fatin,” nia sujere.

Entretantu, iha tinan ne’e Governu, liuhosi Autoridade Munisípiu Dili (AMD) kontratu kompañia ho karreta 50 ho orsamentu hamutuk millaun $1-resin hodi rekalla lixu ba soe iha lixeira Tibar-Liquiça.

Notísia Relevante: Governu aumenta tan kamioneta 20 rekolla lixu iha kapitál Dili

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!