DILI, 30 juñu 2022 (TATOLI)—Diretora Sekretariadu Tékniku Programa Nasionál Dezenvolvimentu Suku (PNDS), Claudinha Soares Pinto, hateten tinan ne’e PNDS nia atividade hotu-hotu ezekuta dala ida no agora iha faze mobilizasaun materiál konstrusaun ba aldeia no suku sira iha territóriu nasionál.
“Ba tinan ne’e nian, ita-nia atividade hotu-hotu PNDS nian la’o dala ida de’it no agora ita iha faze mobilizasaun materiál konstrusaun nian ba iha fatin projetu sira hanesan aldeia no suku iha Timor-Leste laran tomak,” Diretora PNDS hateten ba Agência TATOLI, iha nia knaar fatin, Colmera, Dili, kinta ne’e.
Programa hirak-ne’ebé atu halo iha tinan-ne’e mak hanesan subsídiu ba xefe família kada tinan-tinan sei hetan $200 no programa UKL+, maibé programa UKL+ ne’e iha tipu rua ida maka UKL+ A ne’e haree ba komunidade ne’ebé mak uma nia kakuluk sei taka ho du’ut ka mea parede ne’e, Governu sei troka hotu dala ida.
Programa UKL+ B ne’e implementa ba komunidade ne’ebé ninia uma metin tiha ona maibé Governu troka mak zinku ne’ebé ferujin, Governu sei troka fali kalen foun ho pregu de’it para atu prega fila-fali,
“Ida-ne’e mak Governu nia hakarak no sei kontinua esforsu, servisu makaas para dezenvolvimentu la’o nafatin iha munisípiu to’o suku no aldeia sira iha territóriu Timor-Leste,” nia dehan.
Antes ne’e, PNDS implementa ona projetu 973 hosi totál projetu iha iha territóriu Timor-leste hamutuk 1.818 no projetu ne’ebé seidauk la’o ne’e hamutuk 845 ne’e, inklui ona ho konstrusaun Uma Kbiit Laek, reabilitasaun sede suku 70% no mós atividade PNDS regular sira 68% no UKL 2021 mak liu ona 90%.
Tuir nia, projetu balun seidauk implementa tanba pandemia COVID-19 ne’ebé Governu implementa serka sanitária no jeografikamente iha suku balun estrada aat entaun projetu sira-ne’e labele implementa ho di’ak, maibé tinan ne’e bele la’o dala ida ona.
“Ho Kestaun hirak-ne’e mak ita-nia atividade ladún la’o maibé ita nafatin esforsu hodi kontinua halo reabilitasaun ba sede suku, hadi’a estrada, dada bee-moos, saneamentu, no seluk tan. Maibé ida-ne’e mós ita sei hein udan para lai tanba bainhira udan ita labele halo buat ida, no daudaun ne’e ita só mobiliza materiál konstrusaun ba ita-nia fatin identifikasaun sira iha aldeia no suku,” nia dehan.
Jornalista : Osória Marques
Editór : Cancio Ximenes
