iklan

EKONOMIA, HEADLINE

Timor-Leste lakon biliaun $1,6 tanba implikasaun hosi inflasaun globál

Timor-Leste lakon biliaun $1,6 tanba implikasaun hosi inflasaun globál

Jornada orsamentál tinan 2023, iha salaun Ministériu Finansa, kinta (30/06). Imajen Tatoli/Francisco Sony

DILI, 30 juñu 2022 (TATOLI)–Ministru Finansa, Rui Augusto Gomes, deklara hosi janeiru to’o maiu 2022, Estadu Timor-Leste lakon biliaun $1,6 hosi retornu investimentu fundu petrolíferu. 

“Halo ita-nia balansu fundu to’o 31 maiu 2022 tun ba biliaun $18,3 hosi biliaun $19,1 iha fim marsu 2022. Lakon ida-ne’e akontese tanba implikasaun hosi inflasaun globál iha nasaun boot sira hanesan Amérika no Europa, ne’ebé obriga Banku Sentrál nasaun boot hirak ne’e hasa’e taxa juru no halo merkadu finanseiru monu. Situasaun ida-ne’e ita rasik labele kontrola,” Ministru hateten iha ámbitu jornada orsamentál tinan 2023, iha salaun Ministériu Finansa (MF), Aitarak-laran, kinta ne’e.

Tamba ne’e, governante ne’e husu atu labele kontinua depende ba fundu petrolíferu ba tempu naruk.

“Prinsípiu fiskál sei sai realidade iha tinan sanulu oin mai, bainhira ita dezenvolve fonte reseita alternativa sira seluk,” nia akresenta.

Notísia relevante: Governu realiza jornada orsamentál hodi konkretiza medida Lei GOP 2023

Tanba ne’e, nia argumenta, volatilidade presu iha merkadu finanseiru atuál maka tempu to’o ona atu hahú diversifika produsaun, harii ekonomi reziliente liu no sustentável, hodi hasoru soke interna no esterna hanesan pandemia, dezastre naturál, no krize polítika.

“Atu konkretiza mehi ida-ne’e, ita tenke hahú investe iha setór sosiál hanesan saúde, nutrisaun, edukasaun, abitasaun, bee no saneamentu, protesaun sosiál. To’o ohin loron, Timor-Leste iha de’it instrumentu ne’ebé Governu sira uza hodi provoka kreximentu no dezenvolvimentu ekonómiku, mak Orsamentu Jerál Estadu (OJE). Maibé iha realidade, ita gasta ona osan povu ho maneira ne’ebé mak la sustentável, ein termu Produtu Internu Brutu (PIB), Timor-Leste nia despeza kuaze 90%, ne’ebé konsidera a’as liu iha mundu,” nia esplika.

Tanba ne’e, maski ho orsamentu boot, saida mak Governu haree desde tinan 2009 mak tendénsia output ne’ebé tun hela de’it.

“Ita-nia produtividade laborál limitadu tebes tamba menus investimentu iha ita-nia kapitál umanu, no reseita doméstika seidauk atinje 10% hosi ita-nia PIB tamba impostu kiik. Ohin loron ita bele iha estrada di’ak maibé dalaruma ita laiha enjeñeiru di’ak hodi konstrui estrada foun sira ne’e no halo serbisu manutensaun báziku ba estrada hirak ne’e,” nia tenik.

Tambá ne’e, Ministru Finansa dehan, importante tebes ba atu serbisu hamutuk hodi garante esforsu kolektivu sira bele kontribui hasa’e efisiénsia hodi responde ba problema estruturál, hanesan pobreza, dezempregu, no kontinua presta servisu ba povu.

Tanba ne’e, ho Lei Grande Opsaun Planu (GOP) hamutuk ho orsamentu pur programa ne’ebé implementa ona desde 2020, sei permite atu muda perspetiva ne’ebé sentradu ba taxa ezekusaun orsamentu pur item ba iha perspetiva ne’ebé orientadu ba taxa implementasaun medidas espesífiku sira, nune’e, utilizasaun rekursus OJE no susesu hosi Governu nia asaun sei fasil liután atu sukat.

Jornalista  : Antónia Gusmão

Editora      : Julia Chatarina

iklan
iklan

Leave a Reply

iklan
error: Content is protected !!