iklan

EDUKASAUN, NASIONÁL, POLÍTIKA

SEAK sei realiza lansamentu fatuk dahuluk ba konstrusaun biblioteka nasionál

SEAK sei realiza lansamentu fatuk dahuluk ba konstrusaun biblioteka nasionál

Sekretáriu Estadu Arte no Kultura, Teófilo Caldas. Imajen Tatoli/ Egas Cristovao

DILI, 04 jullu 2022 (TATOLI)-Sekretáriu Estadu Arte no Kultura (SEAK) Teófilo Caldas, segunda (04/06) ne’e relata progresu servisu SEAK nian ba Primeiru-Ministru (PM), Taur Matan Ruak, ligadu ho lansamentu primeira pedra ba konstrusaun biblioteka nasionál ne’ebé sei halo iha 19 jullu tinan ne’e.

Notísia relevante : http://www.tatoli.tl/2022/06/17/seak-anpm-selebra-akordu-estabelese-biblioteka-nasional/

“Sekretáriu Estadu Arte no Kultura ho komisaun organizadora mai marka audiénsia ho sua eselénsia Primeiru-Ministru hodi autualiza ami-nia preparativu, kona-ba lansamentu primeira pedra ba ita-nia biblioteka nasionál”, Teófilo Caldas hateten ba jornalista sira hafoin reuniaun ho Primeiru-Ministru (PM), Taur Matan Ruak, iha Palásiu Governu, segunda ne’e.

Biblioteka Nasionál, orsamentu ne’e mai hosi doadores kompañia ENI iha kedas 2009 to’o agora Governu seida’uk implementa, tanba problema rai.

“Entaun, iha VIII Governu Konstitusionál ne’ebé líderadu hosi ita-nia maun boot Jenerál Taur Matan Ruak fó orientasaun ba Ministériu Ensinu Supérior Siénsia no Kultura no Sekretáriu Estadu Arte no Kultura atu aselera prosesu ne’e hamutuk ho Autoridade Nasionál Petróleu no Minerál (ANPM) no Kompañia ENI. Entaun, ita-nia prosesu konkursu atinje ona pursentu 98 iha faze ne’e”, nia katak.

Dezeñu biblioteka nasionál. Imajen espesiál

Governu liuhosi SEAK asina ona memorandu entendimentu ho ANPM. “Preparasaun lansamentu primeira pedra ba biblioteka nasionál ne’e, ita atualiza ba sua eselénsia Primeiru -Ministru, katak ita kalendáriza lansamentu primeira pedra ba iha 19 jullu (tinan ne’e) no sua eselénsia apresia ho preparativu sira ne’e ho komisaun organizadora nia preparasaun,” nia afirma.

Primeiru-Ministru apresia mós servisu hosi ANPM no kooperasaun hosi kompañia ENI. Tanba, sira mak fó osan.

“Ita-nia relatóriu ne’e ba sua eselénsia Primeiru-Ministru no husu mós sua eselénsia Primeiru- Ministru nia disponibilidade atu partisipa iha lansamentu ne’e hanesan Xefe Governu atu halo diskursu ba timoroan hotu, kona-ba funsionamentu hosi ita-nia biblioteka nasionál,” nia esplika.

Hosi ne’e, resposta Primeiru-Ministru, Taur Matan Ruak, apresia ho komisaun organizadora nia preparativu. Daruak, sua eselénsia Primeiru-Ministru disponível atu partisipa iha lansamentu biblioteka nasionál ne’ebé sei hala’o iha 19 fulan ne’e.

Maske nune’e, nia akresenta, Biblioteka Nasionál ne’e ba futuru sei konserva livru sira ne’ebé mak oras ne’e tau hela iha Sekretáriu Estadu Arte no Kultura, hamutuk rihun ualu resin.

“Biblioteka Nasionál ita-boot sira hatene katak, ida ne’e ita sei konserva livru sira ne’ebé oras ne’e hamutuk rihun ualu resin, besik rihun sia mak ita tau hela iha edifísiu SEAK la iha espasu.

Entaun, ita espera katak ho lansamentu ne’e kompañia kontráktór ne’e sei aselera prosesu konstrusaun iha fulan 18 nia laran, depois nia finaliza ita sei tau livru sira ne’e. La’os livru sira ne’e de’it, maibé ita sei halo dijitalizasaun ba ekipamentu biblioteka ne’e,” Sekretáriu Estadu ne’e informa.

Biblioteka Nasionál ne’e dahuluk, sei fasilita ba públiku. Daruak, estudante sira ne’ebé presiza atu lee livru no buka referensia sira tenke halai ba iha biblioteka nasionál.

“Fatin (Biblioteka nasionál), ita tau iha ADN nia kotuk, Hudi laran. Fatin ne’e, moru ho drainazen hotu ona, ita hein de’it halo lansamentu fatuk dahuluk, depois kompañia hahú ona nia prosesu konstrusaun,” nia dehan.

Kona-ba kompañia ne’ebé toma konta ba konstrusaun biblioteka nasionál, nia akresenta, prosesu tenderizasaun internálmente aplika regra hosi kompañia ENI nian.

“Governu hamutuk ho Autoridade halo de’it steering komite atu bele fó apoiu no fó monitoriza. Kompañia ita-boot (jornalista) sira sei rona, ENI sei anúnsiu no asina kontratu ita-boot sira sei hatene kompañia ne’ebé mak sei halo konstrusaun (Biblioteka Nasionál),” nia afirma.

Medida rai ba konstrusaun biblioteka nasionál, hanesan rai nia luan 27 mill kuadradu.

Entretantu, totál orsamentu ba konstrusaun Biblioteka Nasionál hamutuk milliaun 10, ne’ebé mai hosi kompañia ENI.

Jornalista       : Nelia Fernandes

Editora           : Rita Almeida

iklan
iklan

Leave a Reply

iklan
error: Content is protected !!