COVALIMA, INKLUZAUN SOSIÁL

Governu lori fila vítima inundasaun uma-kain 35 ba sira-nia rezidénsia

Governu lori fila vítima inundasaun uma-kain 35 ba sira-nia rezidénsia

Governu liuhosi Komisaun Jestaun Risku Dezastre Naturál Covalima lori-fila ona vítima inundasaun ba sira-nia hela fatin. Imajen Tatoli/Celestina Teles.

COVALIMA, 05 jullu 2022 (TATOLI—Governu liuhosi Ekipa Komisaun Jestaun Risku Dezastre Naturál (KJRDN) Covalima, tersa ne’e, lori fila ona vítima inundasaun uma-kain 35 iha sentru evakuasaun iha Eskola Sekundáriu Jerál Públiku Suai ba sira ida-idak nia rezidénsia.

Notísia Relevante: PR fó apoiu nesesidade bázika ba vítima inundasaun iha Covalima

“Ohin dadeer, vítima sira hosi aldeia Lo’o no Aidantuik, sira fila ona ba sira-nia hela fatin. Maibé antes sira-atu fila ekipa sira halo ona avaliasaun ba sira-nia hela fatin maibé  bee maran ona, entaun ami mós haruka sira fila, Maibé iha aldeia Akar Laran seidauk fila tanba sei haree iklima bainhira ekipa sei evakua sira mai fali iha sentru evakuasaun, haree situasaun di’ak ona  tenke reintrega ka lori fila sira ba sira nia hela fatin,” Prezidente Komisaun Jestaun Risku  Dezastre Naturál Covalima, Francisco de Andrade, hateten ba jornalista sira iha salaun AMC, Kampung Baru, Covalima.

Vítima inundasaun sira-ne’e horisehik kedas ezije atu fila ona ba sira-nia hela fatin, maibé autoridade la admite atu sira fila ba sira-nia hela fatin tanba haree iklima rai nakukun atu udan fila-fali.

“Dezde horisehk vítima sira ezije atu fila-fali ba sira-nia hela fatin, maibé ha’u la admite sira fila tanba haree ba situasaun sei udan no ohin reintrega ona ba sira ida-idak nia hela fatin,” nia dehan.

Razaun vítima sira husu atu fila-fali ba sira-nia hela fatin, tanba labarik kiik sira balun labele han etu no han de’it mak sasoro, entaun autoridade mós orienta ba kompañia tein sasoro hodi fó labarik sira-ne’e bele han.

Molok vítima sira fila fali ba sira nia hela fatin, Ekipa Komisaun Jestaun Risku Dezastre Naturál halo uluk avaliasaun ba vítima sira-nia hela fatin ne’e bee tama uma ne’e hahú maran ona.

Ekipa Komisaun Jestaun Risku Dezastre Naturál (KJRDN) evakua vítima inundasaun ba sentru Evakusaun Eskola Sekundáriu Jerál Suai iha kinta (30/6) fulan kotuk no iha tersa (05/7) ne’e reintregra ona sira ba ida-idak nia rezidénsia.

Tuir dadus hosi ekipa Komisaun Dezastre Munisípiu Covalima haktuir, vitima inundasaun uma kain-35 ne’ebé kompostu hosi feto ho idade adultu 53, mane ho idade adultu 23, labarik kiik tinan lima mai kraik feto na’in-18 no mane na’in-12, no Ema ho Difisiénsia hamutuk mane rua (2) no feto na’in-ida (1).

Vítima sira-ne’e evakua hosi suku sira hanesan suku Suai Loro na’in-33, aldeia Akar Laran uma-kain 14, aldeia Lo’o uma-kain na’in 18, aldeia Aidantuik iha suku Beco ne’e uma-kain rua no suku Lalawa, postu administrative Tilomar, aldeia Ai-Oan iha uma-kain ida (1).

Nune’e, vítima inundasaun ekipa evakua ba iha sentru evakuasuan ne’e hetan apoiu nesesidade bázika hosi Prezidente Repúblika liuhosi Xefe Kaza Sivil, Lidér Nasionál Kay Rala Xanana Gusmão, Ministru Obra Públika apoiu osan no Cruz Vermelha Timor-Leste (CVTL) Filiál Covalima.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!