DILI, 05 jullu 2022 (TATOLI)–Ministru Koordenadór Asuntu Ekonómiku (MKAE), Joaquim Amaral, husu ba empreza distributór atu kumpre Revoluzaun Governu utiliza produtu lokál programa Cesta Bázika 75%.
“Governu deside tau kedas alvu ida 75% atu ita hotu servisu, tanba ida-ne’e mak ha’u hakarak husu ba setór privadu, liuliu sira ne’ebé hetan kontratu hodi partisipa iha Cesta Bázika atubele kumpre ida-ne’e. Governu servisu hamutuk ho órgaun kontroladór sira atu garante monitorizasaun,” Ministru hateten hafoin relata servisu ba Primeiru-Ministru, Taur Matan Ruak, iha Palásiu Governu, tersa ne’e.
Notísia relevante: Dekretu-lei foun obrigatoriedade sosa ai-han lokál iha ámbitu kontratasaun públika
Nia dehan, entidade hotu servisu hamutuk hodi implementa Rezolusaun Governu, karik iha situasaun produsaun rai-laran mak sei tuur hamutuk fali hodi buka solusaun.
“Maibé foin hahú, entaun ha’u husu atu empreza sira tau-atensaun másimu kona-ba produsaun nasionál ne’ebé iha no kumpre kritéria Governu, nune’e di’ak ba ita hotu,” nia akresenta.
Antes ne’e, Governu liuhosi reuniaun Konsellu Ministru (KM), aprova ho alterasaun, medida distribuisaun Cesta Bázika ba família timor-oan sira ne’ebé presiza liu no apoiu operadór ekonómiku lokál bele kria rejime espesiál kona-ba aprovizionamentu, iha ámbitu planu rekuperasaun ekonómiku.
Ho projetu Dekretu-Lei ne’e, Governu hakarak kontinua fó produtu nesesidade dahuluk no garante sustentabilidade família, ne’ebé iha tempu hanesan atu kria kondisaun normalidade ba atividade produtór no operadór ekonómiku nasionál sira tanba prokura menus.
Jornalista : Antónia Gusmão
Editora : Julia Chatarina
