DILI, 06 jullu 2022 (TATOLI)—Sekretária Meza Parlamentu Nasionál, Lidia Norberta, informa Deputadu sira sei tama iha resesu durante fulan rua (2) ne’ebé sei hahú hosi 15 jullu-15 setembru tinan 2022.
“Iha semana oin 15 jullu ne’e, deputadu sira iha Parlamentu Nasionál sei tama ba resesu ne’ebé hanesan ita-boot sira nota asume mandatu hosi 2018 tesik laiha resesu, tanba produtu lejislativu barak entaun iha nesesidade agora resesu primeira vez ba fulan rua,” Sekretária Meza PN ne’e hateten ba jornalista sira hafoin partisipa reuniaun lidér bankada iha sala konferénsia Parlamentu Nasionál, kuarta ne’e.
Reuniaun lidér bankada ne’e prezide hosi Prezidente Parlamentu Nasionál, Aniceto Longinhos Guterres Lopes, hodi deskute mós ajenda diskusaun sira reuniaun plenária normál ho extraordináriu antes tama ba resesu.
Hanesan ajenda plenária diskute pedidu autorizasaun Prezidente Repúblika atu vizita Indonézia, no mós ajenda ne’ebé inísia hosi PN konvida Primeiru Ministru (PM), iha 14 jullu ne’e sei mai iha PN hodi halo debate kona-ba balansu ka situasaun governasaun iha VIII Governu durante mandatu besik tinan haat ona no halo eleisaun hili membru na’in-rua ba Komisaun rekrutamentu prokuradór.
Enkuantu, iha reuniaun lidér bankada ne’e ko’alia mós oinsá atu asegura reprezentasaun PN nian ba iha konsistóriu iha Roma relasiona ho Amu Papa ne’ebé nomea ona Kardeál na’in-21 inklui kardeál ida hosi Timor-Leste.
Tuir prosesu normál mezmu resesu maibé komisaun permanente nafatin eziste ne’ebé forma tuir rejimentu PN kona-ba kriteiru proporsionalidade númeru deputadu sira hamutuk na’in-28 to’o 29, ne’ebé ho kompozisaun meza Prezidente PN, Vise PN, sekretária no membru suplente.
“Ne’ebé, signifika Parlamentu servisu la’o nafatin komisaun permanente buat ruma mosu ba servisu hanesan babain iha inisiativa lejislativa sira kontinua hala’o iha kestaun balun. Ezemplu, deklarasaun Estadu emerjénsia ne’ebé mak ejize prezensa deputadu sira bele hetan votu liu hosi plenáriu extraordináriu ida para bele konvoka,” nia hateten.
Jornalista : Nelson de Sousa
Editór : Cancio Ximenes
